टी–२० विश्वकप : दक्षिण अफ्रिकाको प्रभावशाली सुरुवात, क्यानडा ५७ रनले पराजित

Share this
676shares
मुलुकी खबर
मुलुकी खबर
clock२०८२ माघ २७, मंगलबार ०७:३७

काठमाडौं । आईसीसी टी–२० विश्वकप क्रिकेटमा दक्षिण अफ्रिकाले प्रभावशाली सुरुवात गरेको छ । समूह ‘डी’ अन्तर्गत सोमबार राति सम्पन्न खेलमा दक्षिण अफ्रिकाले क्यानडामाथि ५७ रनको स्पष्ट जित हात पार्दै प्रतियोगितामा आत्मविश्वासपूर्ण प्रवेश गरेको हो ।

टस जितेर क्यानडाले फिल्डिङ रोजेपछि पहिला ब्याटिङ गरेको दक्षिण अफ्रिकाले निर्धारित २० ओभर खेल्दै ४ विकेट गुमाएर २१३ रनको बलियो योगफल तयार गर्‍यो । उच्च रनरेटमा खेलेको दक्षिण अफ्रिकाको इनिङ्समा कप्तान एडन मार्करम मुख्य आकर्षण बने ।

उनले ३२ बलमा १० चौका र १ छक्का प्रहार गर्दै ५९ रनको आक्रामक अर्धशतक पूरा गरे । उनको इनिङ्सले दक्षिण अफ्रिकालाई ठूलो स्कोरतर्फ डोर्‍यायो ।

क्यानडाका बलरमध्ये अंश पटेल सबैभन्दा सफल देखिए । उनले ३ विकेट लिए पनि अन्य बलरहरूले रन नियन्त्रण गर्न सकेनन् । जसको फाइदा दक्षिण अफ्रिकाले खुलेर उठायो ।

२१४ रनको कठिन लक्ष्य पछ्याएको क्यानडाले सुरुआतमा संघर्ष गर्‍यो । यद्यपि, नवनीत धालिवालले १ छेउ सम्हाल्दै अर्धशतकीय इनिङ्स खेले ।

उनले ४९ बलमा ७ चौका र १ छक्कासहित ६४ रन बनाए पनि टोलीलाई जितसम्म पुर्‍याउन भने सकेनन् । क्यानडाले अन्ततः २० ओभरमा ८ विकेट गुमाउँदै १५६ रनमै सीमित रहनुपर्‍यो ।

दक्षिण अफ्रिकाका लागि तीव्र गतिका बलर लुंगी एनगिडी निर्णायक साबित भए । उनले ४ विकेट लिँदै क्यानडाको ब्याटिङ लाइनलाई लगातार दबाबमा राखे । अन्य बलरहरूले पनि अनुशासित प्रदर्शन गर्दै रन रोक्ने भूमिका खेले ।

यस जितसँगै समूह ‘डी’ बाट दक्षिण अफ्रिका र न्युजिल्यान्ड दुवैले विश्वकपमा विजयी सुरुवात गरेका छन् । दक्षिण अफ्रिकाको यो प्रदर्शनले प्रतियोगितामा उसलाई १ बलियो दाबेदारका रूपमा स्थापित गरेको छ ।

तपाइको प्रतिक्रिया
© 2024 Muluki Khabar. All Rights Reserved. Design & Develop By: Indesign Media Pvt. Ltd.