टी-२० विश्वकप: इटलीसँग नेपाल १० विकेटले स्तब्ध

मुम्बई। आईसीसी टी-२० विश्वकप २०२६ मा नेपालले इटलीसँग १० विकेटको अप्रत्याशित र लज्जास्पद हार व्यहोरेको छ । मुम्बईको वानखेडे स्टेडियममा बिहीबार भएको खेलमा नेपालले दिएको १२४ रनको लक्ष्य इटलीले मात्र १२.४ ओभरमा कुनै विकेट नगुमाई पूरा गर्यो ।

पहिले ब्याटिङ गरेको नेपाल इटलीका स्पिनर सामु निरीह बन्दा १९.३ ओभरमा १२३ रनमै अलआउट भयो । नेपालका लागि आरिफ शेखले २७, रोहित पौडेलले २३ र आसिफ शेखले २० रन जोड्नु बाहेक अन्यले उल्लेख्य प्रदर्शन गर्न सकेनन् । इटलीका क्रिसन कालुगमागेले ३ र बेन्जामिन मानेन्टीले २ विकेट लिए ।

जवाफी ब्याटिङमा इटलीका मोस्का दाजुभाइ एन्थोनी र जस्टिनले विष्फोटक ब्याटिङ गर्दै नेपालको बलिङ ध्वस्त पारे । दुवैले अविजित अर्धशतक प्रहार गरेपछि विश्वकपमा डेब्यु गरिरहेको इटलीले ऐतिहासिक पहिलो जित दर्ता गर्यो ।

लगातार दोस्रो हारसँगै नेपालको सुपर एट पुग्ने सम्भावना निकै कमजोर बनेको छ । यसअघि पहिलो खेलमा नेपाल इंग्ल्याण्डसँग ४ रनले पराजित भएको थियो ।