ग्रामथानमा सामान्य विवादमा खुकुरी प्रहार, एक जना घाइते

मोरङ । मोरङको ग्रामथान गाउँपालिका–१ खुनियाकट्टामा सामान्य विवादका क्रममा खुकुरी प्रहार हुँदा एक जना गम्भीर घाइते भएका छन् । खुकुरी प्रहार गरेको आरोपमा एक जनालाई नियन्त्रणमा लिएको प्रहरीले जनाएको छ ।

खुकुरी प्रहार गरेको आरोपमा ग्रामथान गाउँपालिका–१ खुनियाकट्टाका ३० वर्षीय अजयकुमार ऋषिदेवलाई पक्राउ गरेको प्रहरीले जनाएको छ । प्रहरीका अनुसार बुधबार साँझमा अजय र सोही ठाउँका सुसिया ऋषिदेवबीच भएको विवाद बढ्दै जाँदा अजयले खुसियामाथि खुकुरी प्रहार गरेका थिए ।

Advertisement

खुकुरी प्रहारबाट खुसियाको टाउकोको पछाडिको भागमा चोट लागेको र उनको हाल बुढीगंगास्थित विराट टिचिङ अस्पतालमा उपचार भइरहेको प्रहरीले जनाएको छ ।

प्रहरी चौकी झोराहाटको टोलीले खुकुरीसहित अजयलाई नियन्त्रणमा लिएको हो । पक्राउ परेका उनलाई थप अनुसन्धान र कानुनी कारबाहीका लागि इलाका प्रहरी कार्यालय बेलबारीमा राखिएको प्रहरीले जनाएको छ ।