विराटनगरमा टीभीएसको इलेक्ट्रिक स्कुटर ‘अर्बिटर’ सार्वजनिक

विराटनगर । टीभीएस मोटर कम्पनीको नेपालका लागि आधिकारिक वितरक जगदम्बा मोटर्सले विराटनगरमा बहुप्रतिक्षित इलेक्ट्रिक स्कुटर ‘टीभीएस अर्बिटर’ औपचारिक रूपमा सार्वजनिक गरेको छ ।

विराटनगरका लागि टीभीएसको आधिकारिक बिक्रेता प्रसन्ननाथ डिलर सीपले एक कार्यक्रमका बीच सो स्कुटर सार्वजनिक गरिएको हो । सोरुम सञ्चालक प्रशान्त तातेडले नयाँ मोडलको स्कुटर अनावरण गरे । सहरी दैनिक यात्रालाई दिगो, प्रविधिमैत्री र सहज बनाउने उद्देश्यका साथ नेपाली बजारमा भित्र्याइएको यस स्कुटरको प्रारम्भिक मूल्य २ लाख ८१ हजार ७ सय रुपैयाँ निर्धारण गरिएको छ ।

Advertisement

टीभीएस ‘अर्बिटर’ मा नेपालको विद्युतीय दुई पाङ्ग्रे सवारी क्षेत्रमै पहिलो पटक १४ इन्चको अगाडिको पाङ्ग्रा प्रयोग गरिएको छ । यसले असमान सडकमा पनि सवारी चलाउँदा उत्कृष्ट स्थिरता, नियन्त्रण र सहजता प्रदान गर्ने जगदम्बा मोटर्सका क्षेत्रीय प्रबन्धक अर्जुन खनालले जानकारी दिए ।

यो स्कुटरमा ३.१ किलोवाट आवर क्षमताको ब्याट्री राखिएको छ, जसले एक पटकको फुल चार्जमा १५८ किलोमिटरसम्मको प्रभावशाली आईडीसी रेन्ज दिने कम्पनीको दाबी छ । यसमा रेन्ज सुधार र सुरक्षाका लागि ‘रिजेनेरेटिभ ब्रेकिङ’ प्रविधिसहित इको र सिटी गरी दुई वटा राइडिङ मोडहरू उपलब्ध छन् ।

‘अर्बिटर’ मा ८४५ एमएम लामो सिट, २९० एमएम फुटबोर्ड, १६९ एमएम ग्राउन्ड क्लियरेन्स र दुई वटा हेलमेट सजिलै अट्ने ३४ लिटर क्षमताको विशाल बुट स्पेस छ । भाइजरसहितको फ्रन्ट एलइडी हेडलाइट, एज–टु–एज कम्बिनेसन ल्याम्प र कल तथा एसएमएस अलर्ट देखाउने कलर एलसीडी कनेक्टेड क्लस्टर छ ।

मोबाइल एप कनेक्टिभिटी, दुर्घटना तथा ढल्केको अलर्ट, चोरी, जियो–फेन्सिङ, हिल होल्ड असिस्ट, क्रुज कन्ट्रोल र टर्न–बाय–टर्न दिशा निर्देशन जस्ता अत्याधुनिक सुविधाहरू रहेको कम्पनीले जनाएको छ ।

यो स्कुटर नियोन सनबस्ट, कस्मिक टाइटेनियम र मारटिआन कोपर गरी तीन आकर्षक रङहरूमा उपलब्ध छ । नेपाली सडक र वातावरण अनुकूल परीक्षण गरिएको यो स्कुटरले विद्युतीय गतिशीलता (इलेक्ट्रिक मोबिलिटी) मा नयाँ मापदण्ड स्थापित गर्ने विश्वास कम्पनीले लिएको छ ।