
विराटनगर । सुनसरीको धरानमा बोरामा ‘प्याक’ गरेर मोटरसाइकलमा ओसारपसार गर्दै गरेको अवस्थामा ठूलो परिमाणको लागुऔषध बरामद भएको छ ।
कालाबञ्जारबाट धरानतर्फ जाँदै गरेको को १८ प ४२५६ नम्बरको मोटरसाइकललाई धरान उपमहानगरपालिका–१७ एभीडी खानेपानी ट्यांकी छेउमा रोकेर चेकजाँच गर्दा लागुऔषध फेला परेको हो । बोरामा ‘प्याक’ गरेर मोटरसाइकलमा राखी लागुऔषध लैजाँदै गरेको पाइएको छ ।
इलाका प्रहरी कार्यालय धरानको टोलीले आइतबार बोरामा राखेर लैजाँदै गर्दा ९ हजार ९ सय १९ क्याप्सुल ट्रमाडोल बरामद गरेको हो । लागुऔषध ओसारपसारमा संलग्न २ जनालाई प्रहरीले पक्राउ गरेको छ ।
पक्राउ पर्नेमा मोटरसाइकल चालक कोशी गाउँपालिका–१ का २३ वर्षीय रोशन झा र पछाडि सवार १८ वर्षीय जयप्रकाश यादव रहेका छन् । बरामद भएको लागुऔषध, नियन्त्रणमा लिइएको मोटरसाइकल र पक्राउ परेका दुवै जना इलाका प्रहरी प्रहरी कार्यालय धरानको हिरासतमा छन् ।
उनीहरुविरुद्ध लागुऔषध नियन्त्रण ऐनअन्तर्गतको मुद्दा चलाउने प्रहरीको तयारी छ । पक्राउ परेका दुवै युवा लागुऔषधको कारोबारमा संलग्न रहेको प्रहरीको भनाइ छ ।

























