रंगेलीमा प्रशासन र वडा कार्यालय जलाउनेले कुटे पत्रकार

Share this
762shares
मुलुकी खबर
मुलुकी खबर
clock२०८२ माघ ७, बुधबार १२:१६

रंगेली । मोरङको रंगेलीमा इलाका प्रशासन कार्यालय र वडा कार्यालय जलाएको घटनामा प्रत्यक्ष संलग्न रहेका विवादास्पद व्यक्तिले पत्रकारमाथि निर्घात कुटपिट गरेका छन् ।

जेनजी आन्दोलनको आवरणमा प्रशासन र रंगेली नगरपालिका–६ को वडा कार्यालय जलाउने घटनाको नेतृत्वकर्तामध्येका अन्दाजी ३३ वर्षीय मोहमद सिराजउद्धिनले सक्रिय पत्रकार विशालकुमार मण्डलमाथि आक्रमण गरेका हुन् । नियमित ‘रिपोर्टिङ’ सकेर घर फर्किने क्रममा मंगलबार साँझ पत्रकार मण्डलमाथि बाटो छेकेर गालीगलौज गर्दै कुटपिट गरेको प्रहरीले जनाएको छ ।

मोरङ क्षेत्र नम्बर २ अन्तर्गत सिजुवास्थित निर्वाचन कार्यालयमा उम्मेदवारी दर्तासम्बन्धी गतिविधिको ‘रिपोर्टिङ’ गरेर फर्किँदै गरेका बेला रंगेली बजार क्षेत्रमा रोक्दै सिराजउद्धिनले अपशब्द प्रयोग गर्दै अचानक आक्रमण गरेको पत्रकार मण्डलको भनाइ छ । प्रत्यक्षदर्शीहरूका अनुसार मदिराको नशामा लठ्ठ रहेका सिराजुद्धिनले पत्रकारमाथि कुटपिट गरेका थिए ।

कुटपिटबाट मण्डलको शरीरका विभिन्न भागमा चोट लागेको छ । प्रेस चौतारी मोरङको कार्यसमिति सदस्यसमेत रहेका मण्डल पूर्वी टाइम्स दैनिकमा कार्यरत पत्रकार हुन् ।

प्रेस चौतारी मोरङलगायतका सञ्चार सम्बद्ध विभिन्न संघ संस्थाले विज्ञप्ति जारी गरेर घटनाको विरोध गर्दै दोषीमाथि कारबाही हुनुपर्ने माग गरेका छन् । प्रेस चौतारी मोरङका सचिव नवराज भट्टराईद्वारा जारी विज्ञप्तिमा घटनाप्रति गम्भीर भएर पत्रकारको सुरक्षाको सुनिश्चितता गर्नुपर्ने माग गरिएको छ ।

घटना अत्यन्तै गम्भीर र निन्दनीय रहेको विज्ञप्तिमा उल्लेख छ । घटनापछि पत्रकार मण्डलले पनि दोषीमाथि कडा कानुनी कारबाहीको माग गरेका छन् । उनले समाचार संकलन र सम्प्रेषणकै क्रममा आफूमाथि आक्रमण भएको बताए ।

घटनामा संलग्न सिराजउद्धिनलाई इलाका प्रहरी कार्यालय रंगेलीले पक्राउ गरेको छ । इलाका प्रहरी कार्यालय रंगेलीका इन्स्पेक्टर नरेन्द्रकुमार बोगटी नेतृत्वको टोलीले घटनाको थप अनुसन्धान गरिरहेको छ ।

सिराजउद्धिनविरुद्ध अभद्र व्यवहारसम्बन्धी मुद्दा चलाउने प्रहरीको तयारी छ । स्थानीयका अनुसार सिराजउद्धिन विगतदेखि नै विभिन्न विवादमा पर्दै आएका थिए । प्रहरीका अनुसार सिराजउद्धिन जेनजी आन्दोलनको नाममा गत भदौ २४ गते इलाका प्रशासन कार्यालय र रंगेली–६ को वडा कार्यालयमा आगजनी गरिएको घटनामा संलग्नमध्येका १ जना हुन् ।

उनीविरुद्ध अदालतबाट पक्राउ पुर्जीसमेत जारी भएको थियो । तर, फरार भएकाले प्रहरीले पक्राउ गर्न सकेको थिएन । आगजनी घटनाका अभियुक्त सिराजउद्धिनले अहिले पत्रकार मण्डलमाथि आक्रमण गरेका हुन् ।

सरकारी कार्यालयमा आगजनी गरिएको गम्भीर अभियोग लागेपछि भागेका सिराजउद्धिन अहिले पत्रकार कुटपिट प्रकरणमा पक्राउ परेका छन् । उनलाई कारबाही नगर्न र छाड्नका लागि नेपाली कांग्रेसका केही नेता कार्यकर्ताले प्रहरीलाई दबाब दिएको स्रोतको भनाइ छ । तर, प्रहरीले कानुनी कारबाही अघि बढाएको छ ।

यसले गम्भीर आपराधिक घटनामा राजनीतिक संरक्षणको प्रयास गरिँदा निर्वाचनका बेला नेपाली कांग्रेसको आलोचना भएको छ । प्रशासन र वडा कार्यालयजस्ता सार्वजनिक निकाय जलाउने अभियोग लागेका व्यक्तिले पत्रकारमाथि आक्रमण गर्नु व्यक्तिगत घटना नभएर कानुनी शासन र प्रेस स्वतन्त्रतामाथिको चुनौती भएको प्रेस चौतारी मोरङ अध्यक्ष चिना थापाले बताइन् ।

उनले दोषीलाई राजनीतिक दबाबमा उन्मुक्ति दिन नमिल्ने बताइन् । यस्ता अपराधिक घटनाले मुलुकमा सञ्चारकर्मीको व्यक्तिगत र पेसागत सुरक्षाका बारेमा गम्भीर प्रश्न उठाएको थापाको भनाइ छ ।

तपाइको प्रतिक्रिया
शीर्ष नेताको सम्बोधन, रित्तो दर्शक दीर्घा: मोरङमा कांग्रेस इतर पक्षको अधिवेशन
बहिरा फुटबल टोली दक्षिण कोरिया जाने
मत्स्यपोखरीमा चार दिन पर्यटन, संस्कृति र साहित्यको उत्सव
राप्रपामा अध्यक्षका लागि आधा दर्जन नेताको दौडधुप, लिङ्देनलाई चुनौती
लुम्बिनीले टस जितेर बलिङ रोज्दा सुदूरपश्चिम पहिले ब्याटिङ गर्दै
विराटनगरमा कर दिवस मनाइयो, करदातामैत्री प्रणालीमा जोड
प्रहरीको नाममा भ्रामक सूचना फैलाउने दुई जना नियन्त्रणमा पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
नोबेल मेडिकल कलेज छैटौँ पटक उत्कृष्ट करदाता सम्मानबाट सम्मानित
रुसी खगोल विज्ञान ओलम्पियाडमा एभरेस्टकी स्नेहालाई कांस्य
© 2024 Muluki Khabar. All Rights Reserved. Design & Develop By: Indesign Media Pvt. Ltd.