
पाँचथर । पाँचथरमा भारतबाट अवैधरूपमा भित्र्याइएको ठूलो परिमाणको मदिरासहित १ जना पक्राउ परेका छन् । विशेष सूचनाका आधारमा प्रहरीले ५५ कार्टुन मदिरा बरामद गर्दै हिलिहाङ गाउँपालिका–२ का शंकर प्रसाईंलाई नियन्त्रणमा लिएको हो ।
जिल्ला प्रहरी कार्यालय पाँचथरका अनुसार ताप्लेजुङतर्फ जाँदै गरेको यात्रुबाहक बसमा मदिरा लुकाएर लैजाँदै गरिएको अवस्थामा फिदिम नगरपालिका–जोरसालबाट प्रसाईंलाई पक्राउ गरिएको हो । बसभित्र लुकाइराखिएको अवस्थामा सिक्किमे कञ्चन ब्रान्डका १८ कार्टुन, टाइगर ब्रान्डका ३३ कार्टुन र सिक्किमे गोल्ड ब्रान्डका ४ कार्टुन मदिरा फेला परेको प्रहरीले जनाएको छ ।
प्रहरीका अनुसार बरामद मदिरा अवैधरूपमा भारतबाट ल्याइएको हो । कार्टुनभित्र ६ सय ६० बोतल मदिरा रहेको थियो । पाँचथर प्रहरी प्रमुख डीएसपी अनिश कर्णले बरामद मदिरासहित पक्राउ परेका प्रसाईंलाई आवश्यक कारबाहीका लागि आन्तरिक राजश्व कार्यालय झापा पठाइएको जानकारी दिए ।
उनका अनुसार सीमावर्ती क्षेत्र हुँदै हुने अवैध मदिरा ओसारपसार नियन्त्रणका लागि प्रहरीले निगरानी बढाएको छ । प्रहरीले अवैध मदिरा कारोबारमा संलग्न अन्य व्यक्ति र सञ्जालबारे पनि अनुसन्धान अघि बढाइएको जनाएको छ ।

























