
बारा । बाराको परवानीपुर गाउँपालिका–१ रहरियाडीमा हत्या गरिएको अवस्थामा आमा–छोराको शव फेला परेको छ ।
अज्ञात समूहले धारिलो हतियारले आक्रमण गर्दा ४६ वर्षीया सुमित्रादेवी मण्डल र उनका २४ वर्षीय छोरा रामेश्वर मण्डलको मृत्यु भएको प्रहरीले जनाएको छ । प्रहरीका अनुसार बुधबार बिहान करिब ३ बजेतिर भएको आक्रमणमा परिवारका अन्य २ सदस्यसमेत गम्भीर घाइते भएका छन् ।
घाइते हुनेहरूमा घरमुली ५० वर्षीय जगरूप मण्डल र उनकी छोरी २२ वर्षीया रिना कुमारी रहेका छन् । उनीहरुको परवानीपुरस्थित एलएस न्युरो अस्पतालमा उपचार भइरहेको छ ।
बारा प्रहरीका प्रवक्ता डीएसपी विजयराज पण्डितले घटनाको प्रकृति हेर्दा व्यक्तिगत रिसइबीका कारण हत्या भएको हुन सक्ने देखिन्छ । घटनाको वास्तविक कारण र संलग्न व्यक्तिहरूको पहिचान हुन बाँकी रहेको उनले बताए ।
उनका अनुसार हत्यामा प्रयोग भएको हतियार, आक्रमणको शैली र घटनाको समयलाई आधार मानेर सूक्ष्म अनुसन्धान भइरहेको छ । घटनापछि रहरियाडी क्षेत्रमा त्रास छाएको छ । घटनाको अनुसन्धानमा तालिमप्राप्त कुकुर पनि प्रयोग गरिएको छ ।

























