
इटहरी । जेनजी आन्दोलनको आवरणमा इटहरीमा प्रहरीबाट लुटिएको गोलीसहित प्रहरीले १ जनालाई पक्राउ गरेको छ ।
आन्दोलनकै बेला हराएको ३ राउण्ड गोलीसहित इटहरी उपमहानगरपालिका–१० का टीकाराम श्रेष्ठ पक्राउ परेका हुन् । श्रेष्ठको साथबाट एसएलआर राइफलमा लाग्ने २ राउण्ड र थ्रीनट–थ्री राइफलमा लाग्ने १ राउण्ड गोली बरामद भएको प्रहरीले जनाएको छ ।
जेनजी आन्दोलनका क्रममा प्रहरीको मोबाइल फोन चोरी भएको घटनाको अनुसन्धान गर्ने क्रममा श्रेष्ठको घरमा खानतलासी गर्दा चोरी भएको मोबाइल सेटसहित गोली फेला परेको प्रहरीले जनाएको छ । इलाका प्रहरी कार्यालय इटहरीका डीएसपी सुवास हमालका अनुसार बरामद गरिएका गोली आन्दोलनका क्रममा इटहरीमा प्रहरीबाट लुटिएको पत्ता लागेको छ ।
प्रहरीले पक्राउ परेका श्रेष्ठमाथि हातहतियार तथा खरखजना सम्बन्धी मुद्दामा म्याद थप गरी अनुसन्धान अघि बढाएको छ । बरामद गोली कसरी उनको घरसम्म पुग्यो, यसमा अन्य व्यक्तिको संलग्नता छ वा छैन भन्ने विषयमा समेत विस्तृत अनुसन्धान भइरहेको प्रहरीले जानकारी दिएको छ ।
यसैबीच, जेनजी आन्दोलनकै क्रममा इलाका प्रहरी कार्यालय इटहरीको हिरासतबाट फरार भएका ३५ जनामध्ये हालसम्म २२ जना थुनुवालाई नियन्त्रणमा लिइसकिएको प्रहरीले जनाएको छ । बाँकी फरार व्यक्तिहरूको खोजी कार्य तीव्र पारिएको र आन्दोलनका क्रममा भएका सबै आपराधिक गतिविधिको निष्कर्षमा पुग्ने गरी अनुसन्धान अघि बढाइएको डीएसपी हमाल बताउँछन् ।

























