
काठमाडौं । नेपाल प्रहरीका एआईजी (प्रहरी अतिरिक्त महानिरीक्षक)सहितका अधिकारीले दायर गरेको रिटमा सर्वोच्च अदालतले अन्तरिम आदेश दिन अस्वीकार गरेको छ ।
प्रहरी अधिकारीले उमेर हदअनुसार अवकाशमा नपठाउन माग गर्दै भदौ १२ गते सर्वोच्चमा रिट दर्ता गरेका थिए । उनीहरुको रिटमाथि सुनुवाइ गर्दै सर्वोच्चका न्यायाधीशहरु सपना प्रधान मल्ल र कुमार चुँडालको संयुक्त इजलासले अन्तरिम आदेश दिन नमानेको हो ।
एआईजी श्यामलाल ज्ञवाली, डीआईजी (प्रहरी नायव महानिरीक्षक)हरु यज्ञविनोद पोखरेल, केदार ढकाल, राजेशनाथ बाँस्तोला र इन्सपेक्टर (प्रहरी निरीक्षक) नागेन्द्र ठाकुरले दायर रिटको मुद्दालाई भने सर्वोच्चले अग्राधिकार दिएको छ । उमेर हदका कारण अवकाश हुन नहुने माग गर्दै अदालत पुगेका उनीहरुलाई प्रहरी किताबखानाले भने अवकाशको पत्र थमाइसकेको छ ।
सोही पत्र कार्यान्वयनमा रोक लगाउन उनीहरुले अन्तरिम आदेश माग गरेका थिए । एआईजी ज्ञवाली भदौ २७ गते उमेर हदका कारण अवकाशमा जाँदैछन् ।

























