
काठमाडौं । नेपाल प्रहरीकी इन्सपेक्टर (प्रहरी निरीक्षक) बिनु शाहीमाथि कारबाही सुरु भएको छ ।
उनी प्रहरी प्रभाग भैंसेपाटीमा कार्यरत थिइन् । आर्थिक लेनदेनको आरोप लागेपछि शाहीलाई जिम्मेवारीबाट हटाएर थप कारबाहीको प्रक्रिया अघि बढाइएको हो । गत जेठ २३ गते उनलाई भैंसीपाटी पठाइएको थियो । उनलाई निलम्बन गर्ने तयारी छ ।
‘हनिट्रयाप’को गिरोहसँग मिलेर बलात्कार सम्बन्धी मुद्दामा फसाइदिने भन्दै १ जना व्यक्तिसँग रकम लिएको आरोप उनीमाथि लागेको छ । ३० लाख रकम लिएको र आधा इन्सपेक्टर शाहीले पाउने सर्त रहेको प्रहरी स्रोतले बतायो । यद्यपि, जिल्ला प्रहरी कार्यालय ललितपुरले भने यसको पुष्टि गरिसकेको छैन ।
शाहीमाथि छानबिन गर्नका लागि उपत्यका प्रहरी कार्यालय, रानीपोखरीले समिति गठन गरेको छ । डीएसपी नरहरि अधिकारीको नेतृत्वमा ७ सदस्यीय समिति गठन गरेर छानबिनको प्रक्रिया अघि बढाइएको हो ।
यही घटनामा संलग्न रहेका २ जनालाई प्रहरीले पक्राउ गरिसकेको छ । पक्राउ परेकामाथि आपराधिक लाभ सम्बन्धी कसुरमा कारबाही अघि बढाउन अनुसन्धान भइरहेको प्रहरीले जनाएको छ ।
जिल्ला प्रहरी कार्यालय कञ्चनपुरमा कार्यरत हुँदा पनि इन्सपेक्टर शाही विवादमा परेकी थिइन् । हिरासतमा भएका थुनुवा तथा आफ्नै प्रहरी कर्मचारीमाथि ज्यादती गरेको लगायतका घटनामा उनी मुछिएकी थिइन् ।
कञ्चनपुरमा कार्यरत प्रहरी जवान राजेन्द्र नाथले २०८० माघमा शाहीकै कारण राजीनामा दिनु परेको बताएका थिए । त्यसबारे समाचार लेखेको आरोपमा कञ्चनपुर प्रहरीले पत्रकारद्वय पुष्कर भट्ट र ऐश्वर्या कुँवरलाई पक्राउ गरेको थियो । त्यो घटनाको चौतर्फी विरोधसमेत भयो ।

























