
विराटनगर । लागुऔषध खैरो हेरोइन (ब्राउन सुगर)सहित विराटनगरबाट बिहीबार दिउँसो २ जना पक्राउ परेका छन् ।
भारतको जोगवनीबाट खैरो हेरोइन खरिद गरेर फर्किएकाहरु विराटनगर महानगरपालिका–१५ स्थित १ नम्बर ढाटबाट पक्राउ परेका हुन् । लागुऔषध नियन्त्रण ब्युरो विराटनगरबाट खटिएको टोलीले दिउँसो ३ः३० बजेतिर मोरङको सुन्दरहरैँचा नगरपालिका–१२ का ३० वर्षीय शंकर दाहाल र २५ वर्षीय नन्दु फुयाँललाई पक्राउ गरेको हो ।
दाहाल र फुयाँल सवार को ६ प ९६ नम्बरको मोटरसाइकललाई प्रहरीले नियन्त्रणमा लिएर खानतलासी गरेको थियो । त्यस क्रममा मोटरसाइकल चालक दाहालको साथबाट खैरो हेरोइनजस्तो देखिने वस्तु २.६१ ग्राम बरामद भएको प्रहरीले जनाएको छ ।
मोटरसाइकल र लागुऔषधसहित दुवै जनालाई इलाका प्रहरी कार्यालय रानीमा राखिएको छ । उनीहरुविरुद्ध लागुऔषध ऐनअन्तर्गतको मुद्दा चलाउने प्रहरीको तयारी छ ।

























