बाढीबाट प्रभावित भएकाहरुविराटनगर । अविरल वर्षासँगै आएको बाढीले झापामा २ जनालाई बगाएको छ । एउटा मोटरसाइकल पनि बाढीमा बगेको छ । प्रहरीका अनुसार बाढीले दुई वटा पुलमा क्षति पुगेको छ ।
झापाको कचनकवल गाउँपालिका–१ मा १४ वर्षीया बालिका र सोही पालिकाको वडा नम्बर २ मा बाढीले मोटरसाइकल बगाएको हो ।
शुक्रबार दिउँसो कचनकवल गाउँपालिका –१ स्थित चमर भीत्ताबाट झकुवा टोल आउँदै गरेकी १४ वर्षीया नेहारिका राजवंशीलाई जमुवा खोलाले बगाएको हो । बाढीमा बेपत्ता भएकी बालिकाको खोजी भइरहेको प्रहरीले बताएको छ ।
झापाको कमल गाउँपालिका– १ बस्ने ३५ वर्षीय टिकाराम चौधरीलाई कृष्ने खोलाले बगाएको छ । माछा मार्ने क्रममा बेपत्ता भएका उनको खोजी भइरहेको जिल्ला प्रहरी कार्यालय झापाले जनाएको छ ।
कचनकवल– २ मा अमरखुट्टा खोला तर्ने क्रममा प्र।१–०२–०५प ६९७८ नम्बरको मोटरसाइकल खोलाले बगाएको प्रहरीले बताएको छ । चालक सोही स्थानका २७ वर्षीय रबिन भट्टराईको अवस्था सामान्य रहेको प्रहरीले बताएको छ ।
बाढीले एउटा पुलमा क्षति पुगेको छ, भने एउटा पुल बगाएको झापा प्रहरी प्रवक्ता डीएसपी कृष्णकुमार चन्दले जानकारी दिए ।
अर्जुनधारा नगरपालिका– ७ मा बिरिङ खोलामा रहेको खुदुनाबारी–शनिश्वरे जोड्ने मोटरेवल पुलमा क्षति पुगेको छ । कचनकवल – १ मा अदुवा खोलामा रहेको काठको पुल पनि बाढीले बगाएको छ ।

























