
इटहरी । सुनसरीको रामधुनी नगरपालिका–३ का ४० वर्षीय रमेन्द्र पौडेलले निर्माण सामग्री किन्ने बहानामा करोडौं रुपैयाँ ठगी गरेको खुलेको छ ।
‘आधारशिला सप्लायर्स’ नामक फर्ममार्फत उनले स्थानीय व्यवसायी, प्रहरी कर्मचारी र सर्वसाधारणलाई विश्वासमा पारी रकम असुली गरेका हुन् । सुरुमा सानो परिमाणमा सामान किनेर तत्कालै भुक्तानी गर्ने र त्यसपछि ठूलो परिमाणको सामान लिएर चेक दिएको पाइएको छ । त्यसको रकम नतिरी फरार भएका पौडेल १ वर्षभन्दा बढी समयदेखि सम्पर्कविहीन छन् ।
पीडित टेकनाथ ढकालका अनुसार पौडेलले २०७८ देखि २०७९ सालसम्म आफूलाई करिब १ करोड ३४ लाख ५८ हजार रुपैयाँ बराबरको चेक दिएका थिए । तीमध्ये २ चेक ‘एभरेष्ट केमिकल ट्रेडर्स’ र २ चेक रमा ढकालको नाममा काटिएका थिए ।
४ वटा चेक बाउन्स भएपछि पौडेलले ठगी गरेको पुष्टि भएको हो । ढकालले भने, ‘सुरुमा विश्वास जिते । ठूलो कारोबार गर्न थालेपछि पैसा तिर्न छाडे । अहिलेसम्म पौडेलसँग १ करोड ७५ लाख उठ्न बाँकी छ ।’
यस प्रकरणमा प्रहरी कर्मचारीसमेत पीडित बनेका छन् । रमेन्द्र पौडेलसँग चिनजानको भरमा १ प्रहरी कर्मचारीले उनलाई ३ लाख रुपैयाँभन्दा बढी सापटी दिएका थिए । ती प्रहरी भन्छन्, ‘मैले अरूलाई सावधानी अपनाउन सुझाउँथे । तर, आफैँ ठगिएँ ।’
पौडेलविरुद्ध पीडित टेकनाथ ढकालले जिल्ला प्रशासन कार्यालय मोरङमा उजुरी दिएका छन् । त्यसपछि कार्यालयले २०८२ असार १६ गते जिल्ला प्रहरी कार्यालय मोरङलाई पत्र लेख्दै पौडेललाई छलफलका लागि उपस्थित गराउने अनुरोध गरेको छ । पत्रमा उल्लेख भएअनुसार ‘निर्माण सामग्री खरिद गरेको रकम नदिएको’ उजुरीको आधारमा अनुसन्धान थाल्न भनिएको छ ।
यसैगरी, इटहरीका अर्का व्यवसायी गोपालकृष्ण श्रेष्ठले २०८१ भदौ ३१ गते सुनसरी जिल्ला अदालतमा पौडेलविरुद्ध मुद्दा दायर गरेका थिए । श्रेष्ठलाई पनि पौडेलले राष्ट्रिय वाणिज्य बैंकमार्फत २ लाख २० हजार रुपैयाँको चेक दिएका थिए । तर, त्यो चेकसमेत नसाटिएपछि अदालतले पौडेलबाट भुक्तानी हुनुपर्ने फैसला गरेको छ । तर, पनि पौडेल फरार नै छन् ।
पौडेलकै कम्पनीमा काम गरेका कर्मचारीका अनुसार उनी अहिले प्रत्यक्ष रूपमा नदेखिए पनि अरू व्यक्तिहरूलाई प्रयोग गरी पीडितहरूलाई धम्की दिइरहेका छन् । ती कर्मचारीले भने, ‘मुद्दा मिलाउनुपर्छ भनेर धम्की दिने क्रम बढ्दै गएको छ ।’
पीडित टेकनाथ ढकालले पौडेल काठमाडौं भागेका हुन् भन्ने शंका व्यक्त गरेका छन् । उनले भने, ‘राजनीतिक संरक्षणमा भागेका हुन् । प्रशासनिक पत्रचार भएर मात्र केही हुँदैन ।’
रामधुनी, इटहरी र विराटनगर क्षेत्रका थुप्रै व्यवसायी र सर्वसाधारण पौडेलको ठगीबाट पीडित बनेका छन् । सामूहिक उजुरीको तयारी भइरहेको छ भने प्रहरी र प्रशासनमाथि दबाब पनि बढ्दै गएको छ । पीडितहरू लिखित उजुरी, प्रमाण र चेकहरू प्रशासन र प्रहरी कार्यालयमा दर्ता भए पनि हालसम्म पौडेल पक्राउ नपरेको बताउँछन् ।
सुनसरी प्रहरीका प्रवक्ता डीएसपी योगराज खतिवडाले भने, ‘हामीकहाँ अहिलेसम्म लिखित उजुरी आएको छैन जस्तो लाग्छ । उजुरी आएपछि खोजी र अनुसन्धान अघि बढ्छ ।’ तर, पीडितहरू भने कागजपत्रसहित उजुरी दिइसकेको बताउँछन् ।
यो प्रकरणले निर्माण सामग्री व्यवसाय गर्ने व्यापारीहरू मात्र होइन, प्रहरीजस्ता सचेत कर्मचारीसमेत ठगिने अवस्था सृजना भएको देखाएको छ । राज्य संयन्त्रको अनुसन्धान गति सुस्त भएको र कानुनी संरक्षणको आशंका बढ्दै गएको भन्दै सर्वसाधारणमा असन्तोष बढ्दै गएको छ ।

























