
काठमाडौं । प्रहरीले गुण्डा नाइके चक्रे मिलन उर्फ मिलन गुरुङसहित पक्राउ परेका १९ जनालाई प्रहरीले ७ दिन म्याद थप गरेको छ । मिलनको जन्मदिन पाटीबाट पक्राउ परेका १९ लाई प्रहरीले ७ दिन म्याद थप गरेको हो ।
गएराति महाराजगञ्जको एक होटलबाट पक्राउ परेका उनीहरुलाई ७ दिन हिरासतमा राखेर अनुसन्धान गर्न जिल्ला प्रशासन कार्यालय, काठमाडौंले अनुमति दिएको हो । ४७ जना समातिए मध्ये २८ जनालाई प्रहरीले छाडेको थियो । १९ जनालाई अभद्र व्यवहारको कसुर गरेको आरोपमा म्याद थप गरेको हो ।
चक्रे मिलनसहित गणेशबहादुर बोगटी, निराजन पौडेल, रोशन सुवेदी, राजेश खड्का, सन्दिप केसी, राहुल खड्का, यामु पौडेल, सौरभ सुनार, डिल्लीराज कँडेल, ऋतिक लामा, चन्द्रदेव कार्की, जीतबहादुर लामा, प्रकाश गोले, अमिर आले मगर, उत्तम महर्जन, प्रनिश केटल, राजु परियार र सफल शाहीलाई हिरासतमा राखेको हो । मध्यराति जन्मदिन पार्टी मनाउने नाममा होहल्ला गरेको भन्दै प्रहरीले उनीहरुलाई समातेको थियो ।

























