
विराटनगर । झापामा रुखमा बाधेको अवस्थामा एक पुरुषको शव फेला परेको छ । झापाको झापा गाउँपालिका–१ लसुनामा आँपको रुखमा बाधेको अवस्थामा बुधबार बिहान स्थानीय ६० वर्षीय जतन सोरेन मृत फेला परेका हुन् ।
अत्यधिक मदिरा सेवन गरेका सोरेनलाई मंगलबार राति स्थानीयले आँपको रुखमा बाँधेर छाडेका थिए । भोलिपल्ट बिहान करिब ४ बजे बाँधेकै स्थानमा उनी मृत फेला परेका हुन् ।
प्रहरीका अनुसार छिमेकी महादेव टुडूको घर छेउ पुगेर काम्न थालेपछि महादेवसहित स्थानीयले घर छेउमा रहेको आँपको रुखमा प्लाष्टिकको डोरीले बाँधेर छाडेका थिए । बुधबार बिहान करिब ४ बजे उठेर हेर्दा मृत्यु भइसकेको देखेर प्रहरीलाई खबर गरेका थिए ।
झापा प्रहरीका प्रवक्ता डीएसपी खगेन्द्रबहादुर खड्काका अनुसार मृतकका छोरा २७ वर्षीय अनतलाल सोरेन, सोही स्थानका ५० वर्षीय महादेव टुडू, २० वर्षीय लुखिराम टुडू र २१ वर्षीय लखिराम टुडू पक्राउ परेका छन् ।
उनीहरुमाथि अनुसन्धान भइरहेको छ । घटनामा संलग्न केही व्यक्ति फरार रहेको र उनीहरुको खोजी तीव्र पारिएको डीएसपी खड्काले बताए ।

























