
काठमाडौं । दैलेखकी एक जना १२ वर्षीया बालिकालाई बलात्कार गरेको आरोपमा प्रहरीले २ जनालाई पक्राउ गरेको छ ।
चामुण्डाबिन्द्रासैनी –८ का २३ वर्षीय गोविन्दबहादुर शाही र २५ वर्षीय खगेन्द्र भण्डारीलाई १२ वर्षीया बालिकालाई बलात्कार गरेको आरोप पक्राउ गरिएको प्रहरीले जनाएको छ ।
प्रहरीका अनुसार साउन २२ गते राति तिजको नाच हेरेर फर्कँदै गरेकी बालिकालाई पक्राउ परेका दुवै जनाले बलात्कार गरेको खुलेको छ ।
तिजको नाच हेरेर फर्किँदै गर्दा उनीहरूले बालिकालाई पालैपालो बलात्कार गरेको अनुसन्धानको क्रममा खुलेको प्रहरीले जनाएको छ ।
साउन २२ गते राति उनीहरू सँगै तीजको नाच हेरिरहेका थिए । नाच हेरेर एकै उमेरका ४ / ५ जना किशोरीको समूह घर फर्किँदै थियो । त्यही समयमा गोविन्द र खगेन्द्रले उनीहरूलाई पिछा गरेका थिए ।
पिछा गरेको थाहा पाएपछि किशोरीहरू भागे । त्यहीमध्येकै एक किशोरी भाग्ने क्रममा लडेपछि गोविन्द र खगेन्द्रले उनलाई पालैपालो बलात्कार गरेको प्रहरीले जनाएको छ ।
उनीहरूले ती बालिकालाई ढुंगासमेत प्रहार गरेका थिए । ढुंगाले हातमा चोट लागेका कारण बालिका धेरै भाग्न नसकेको हो । त्यहाँबाट भाग्न सफल अन्य किशोरीहरूले तत्कालै घरमा घटनाबारे जानकारी दिएपछि अभिभावकहरू घटनास्थल पुगेका थिए ।
बालिकाका आफन्तहरू आएको थाहा पाएपछि गोविन्द र खगेन्द्र त्यहाँबाट भागेका थिए ।
पीडित बालिकाका आफन्तले प्रहरीमा जाहेरी दिएका थिए । सोही जाहेरीका आधारमा ती युवाहरूलाई पक्राउ गरिएको प्रहरीले जनाएको छ ।
बालिकालाई घटना लगत्तै उपचारका लागि अस्पताल पुर्याइएको थियो । उनको दाहिने हात मर्केको छ भने गुप्तांगमा घाउ रहेको चिकित्सकहरूले जनाएका छन् ।
उनको जिल्ला अस्पतालमा उपचार भइरहेको र अवस्था सामान्य रहेको प्रहरीले जनाएको छ । घटनाबारे थप अनुसन्धान भइरहेको प्रहरीले जनाएको छ ।

























