
इनरुवा । मलद्वारमा खैरो हेरोइन (ब्राउन सुगर) लुकाएर ल्याउने २ जना सुनसरीको इनरुवा नगरपालिका–४ बसपार्कबाट शुक्रबार साँझ पक्राउ परेका छन् ।
लागुऔषध ब्राउन सुगरसहित धनकुटा नगरपालिका–९ का ३१ वर्षीय सरोज क्षेत्री र २९ वर्षीय प्रेम थापा पक्राउ परेका हुन् । सुनसरी प्रहरीका प्रवक्ता डीएसपी योगराज खतिवडाका अनुसार अस्थायी प्रहरी पोष्ट बसपार्क इनरुवा र जिल्ला प्रहरी कार्यालय सुनसरीबाट खटिएको संयुक्त टोलीले साँझ ७ बजेतिर दुवै जनालाई नियन्त्रणमा लिएको हो ।
चेकजाँचका क्रममा सरोज क्षेत्रीले मलद्वारमा चेपेर लुकाइराखेको अवस्थामा ब्राउन सुगरजस्तो देखिने वस्तु ३ ग्राम ३ सय २२ मिलिग्राम बरामद भएको जानकारी खतिवडाले दिए । पक्राउ परेका दुवै जनालाई जिल्ला प्रहरी कार्यालय इनरुवा सुनसरीको हिरासतमा राखिएको छ ।
उनीहरुविरुद्ध लागुऔषध ऐनअन्तर्गतको मुद्दा चलाउने प्रहरीको तयारी छ । प्रहरीले थप अनुसन्धान भइरहेको उल्लेख गरेको छ ।

























