
सुनसरी । सुनसरीको इटहरी उप–महानगरपालिका–७ बालग्रामस्थित एउटा घरमा प्रहरीले छापा मार्दा लागुऔषध ब्राउन सुगर (खैरो हेरोइन) र नगदसहित २ जना पक्राउ परेका छन् ।
विशेष सूचनाको आधारमा मंगलबार साँझ करिब ७ः४० बजेतिर इलाका प्रहरी कार्यालय इटहरी र प्रहरी चौकी बालग्रामबाट खटिएको संयुक्त टोलीले भोजराज कार्कीको घरमा कोठा भाडामा बस्ने २ जनालाई नियन्त्रणमा लिएको हो । पक्राउ पर्नेमा सुनसरीको रामधुनी नगरपालिका–६ का २८ वर्षीय विप्लव चौधरी र इलाम फाक्फोकथुम गाउँपालिका–६ की २७ वर्षीया सुष्मा राई रहेका छन् ।
उनीहरूको कोठामा खानतलासी गर्दा लुकाइछिपाइ राखिएको अवस्थामा ब्राउन सुगरजस्तो देखिने वस्तु ३४.५६ ग्राम तथा नगद ७६ हजार १ सय रुपैयाँ फेला परेको सुनसरी प्रहरी प्रमुख एसपी सुमनकुमार तिम्सिनाले बताए । पक्राउ परेका दुवै जनामाथि इटहरी प्रहरीले थप अनुसन्धान गरिरहेको छ ।

























