गौर हत्याकाण्ड : १९ वर्षपछि फाइल खुल्यो, अनुसन्धानमा चुनौती

Share this
684shares
मुलुकी खबर
मुलुकी खबर
clock२०८२ भदौ १६, सोमबार १२:५९
फाइल फोटो ।

जनकपुरधाम । रौतहटको गौरमा १९ वर्षअघि भएको सामूहिक हत्याकाण्डको फाइल फेरि खुलेको छ। लामो समयदेखि थन्किएको मुद्दाको अनुसन्धानलाई प्रहरीले अघि बढाएको हो ।

सर्वोच्च अदालतको परमादेशपछि प्रहरीले अनुसन्धान प्रक्रिया सुरु गरेको छ । २०६३ साल चैत ७ गते गौरस्थित राइस मिलमा तत्कालीन मधेसी जनअधिकार फोरम र नेकपा माओवादीका कार्यकर्ताबीच हिंसात्मक झडप हुँदा ५ जना महिलासहित २७ जनाको हत्या भएको थियो ।

घटनामा सयभन्दा बढी घाइते भएका थिए । राजनीतिक विवाद, शक्ति सन्तुलन र राज्यको उदासिनताका कारण पीडित परिवारले न्याय पाउन सकिरहेका थिएनन् । तर, सर्वोच्च अदालतको आदेशपछि घटनामा संलग्नमाथि कानुनी प्रक्रिया अघि बढ्ने बाटो खुलेको हो ।

मधेश प्रदेश प्रहरी प्रमुख डीआईजी उमाप्रसाद चर्तुवेदीका अनुसार गौर घटनाका आरोपित १ सय ३० जनाको तीनपुस्ते विवरण संकलन भइरहेको छ । उनले भने, ‘अनुसन्धान प्रारम्भ भइसकेको छ । हालसम्म संकलित सूचनाअनुसार ११ जना आरोपितको मृत्यु भइसकेको देखिन्छ । तर, प्रमाणित मृत्युदर्ता खोज्दै छौँ । कसैले मृत्युकै ‘ओट’ लगाएर कानुनी जिम्मेवारीबाट पन्छिन नपाओस् भन्ने हाम्रो लक्ष्य हो ।’

यो घटनासम्बन्धी किटानी जाहेरी २०६८ साल चैत २८ गते नै जिल्ला प्रहरी कार्यालय गौरमा दर्ता गरिएको थियो । तर, त्यसबेला देखिएको राजनीतिक दबाब र प्रशासनिक उदासिनताले मुद्दा कहिल्यै अघि बढेन ।

पीडित परिवारले २ वर्षअघि सर्वोच्च अदालतमा रिट दायर गरेका थिए । न्यायाधीश तिलप्रसाद श्रेष्ठ र नित्यानन्द पाण्डेको इजलासले पीडित पक्षको माग अनुसार भदौ २ गते परमादेश जारी गर्दै प्रहरीलाई अनुसन्धान अघि बढाउन आदेश दिएको थियो ।

गौर हत्याकाण्डमा जसपा अध्यक्ष उपेन्द्र यादवसहित १ सय ३० जनालाई प्रतिवादी बनाइएको छ । यादव नेतृत्वको पार्टी भने यो मुद्दा राजनीतिक प्रतिशोधका आधारमा अघि बढाइएको भन्दै लगातार विरोधमा छ ।

जसपाले सर्वोच्चको आदेशविरुद्ध प्रदर्शनसमेत गरिरहेको छ । तर, पीडित परिवार भने यसलाई न्याय पाउने अन्तिम अवसरको रूपमा लिइरहेका छन् । तत्कालीन २ शक्तिशाली राजनीतिक शक्तिबीचको टकरावले ठूलो नरसंहार भएको थियो ।

उपेन्द्र यादव नेतृत्वको मधेसी जनअधिकार फोरमले गौरमा आमसभा गर्ने तयारी गरेको समयमा माओवादीले पनि त्यही दिन र स्थानमा सभा गर्ने घोषणा गरेपछि विवाद चरममा पुगेको थियो । त्यसपछि भएको भिडन्तले रगतपात निम्त्यायो, जसको दाग अझै पनि रौतहटको राजनीतिक भूगोलमा गढिएको छ ।

पीडित परिवारका सदस्यहरू भन्छन्, ‘हामीले न्याय माग्दा दशकौंसम्म सुनुवाइ भएन । अब सर्वोच्चको आदेशपछि प्रहरी सक्रिय भएको देख्दा केही आशा पलाएको छ । तर, यसपालि पनि राजनीतिक दबाबले मुद्दा फेरि थन्किने हो भने हामी सधैंका लागि न्याय विहीन हुन्छौं ।’

प्रहरीको चुनौती भने कम छैन । १९ वर्षअघि भएका प्रत्यक्षदर्शी साक्षीहरू कतिपयको मृत्यु भइसकेको छ । कतिपय बुढ्यौलीका कारण घटनाबारे स्पष्ट विवरण दिन सक्ने अवस्थामा छैनन् । अझ कतिपय आरोपितहरू शक्तिशाली राजनीतिक हैसियतमा पुगेका छन् । यस्तो अवस्थामा अनुसन्धानलाई निष्पक्ष र प्रमाणमा आधारित बनाउन प्रहरीमाथि ठूलो चुनौती छ ।

गौर हत्याकाण्ड नेपाली राजनीतिक इतिहासकै कालो पानामा अंकित छ । लामो समयसम्म धुलो जमेको यो मुद्दा सर्वोच्चको परमादेशपछि फेरि खुल्दै छ । तर, यसको अनुसन्धान निक्कै चुनौतीपूर्ण हुने देखिन्छ ।

तपाइको प्रतिक्रिया
शीर्ष नेताको सम्बोधन, रित्तो दर्शक दीर्घा: मोरङमा कांग्रेस इतर पक्षको अधिवेशन
बहिरा फुटबल टोली दक्षिण कोरिया जाने
मत्स्यपोखरीमा चार दिन पर्यटन, संस्कृति र साहित्यको उत्सव
राप्रपामा अध्यक्षका लागि आधा दर्जन नेताको दौडधुप, लिङ्देनलाई चुनौती
लुम्बिनीले टस जितेर बलिङ रोज्दा सुदूरपश्चिम पहिले ब्याटिङ गर्दै
विराटनगरमा कर दिवस मनाइयो, करदातामैत्री प्रणालीमा जोड
प्रहरीको नाममा भ्रामक सूचना फैलाउने दुई जना नियन्त्रणमा पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
नोबेल मेडिकल कलेज छैटौँ पटक उत्कृष्ट करदाता सम्मानबाट सम्मानित
रुसी खगोल विज्ञान ओलम्पियाडमा एभरेस्टकी स्नेहालाई कांस्य
© 2024 Muluki Khabar. All Rights Reserved. Design & Develop By: Indesign Media Pvt. Ltd.