
विराटनगर । विराटनगर महानगरपालिका–३ मा रहेको बाल सुधारगृहबाट बुधबार बिहान भागेका बाल बिज्याइँकर्ताहरु धमाधम पक्राउ परिरहेका छन् ।
गृहमा रहेकामध्ये २ सय भन्दा बढी बाल बिज्याइँकर्ताहरु एकैपटक भागेका थिए । गृहमा २ सय ५५ जना बाल बिज्याइँकर्ताहरु थिए । तीमध्ये करिब ५० जनाजति भने नभागेको जिल्ला प्रहरी कार्यालय मोरङले जनाएको छ । ‘५० जनाजति भित्रै बसे । अरु बाल सुधारगृहबाट फरार भए । अहिले धमाधम पक्राउ परिरहेका छन्,’ प्रहरीका १ अधिकृतले भने ।
ती अधिकृतका अनुसार गृहको मुख्य गेटको चाबी एक्कासि फुटाएर बाल बिज्याइँकर्ताहरु भागेका थिए । गृहको सुरक्षाका लागि खटिएका सुरक्षाकर्मीलाई लछारछपार पार्दै उनीहरु फरार भएको प्रहरीले जनाएको छ ।
सुधारगृहको सुरक्षाका लागि २० जनाभन्दा बढी सुरक्षाकर्मी परिचालन गरिएको थियो । यो समाचार तयार पार्दासम्म फरार भएकामध्ये १ सय ५० जनालाई पक्राउ गरिसकिएको प्रहरीले जनाएको छ ।
भागेका अन्यलाई नियन्त्रणमा लिन नेपाली सेना, नेपाल र सशस्त्र प्रहरी परिचालन गरिएको छ । भागेहरुलाई सुरक्षाकर्मीसहितको टोलीले नियन्त्रणमा लिएर सुधारगृहभित्र लगेका छन् । फरार भएका बाल बिज्याइँकर्तालाई स्थानीयले पनि नियन्त्रणमा लिएर सुरक्षाकर्मीको जिम्मा लगाइरहेको प्रहरीले जनाएको छ ।

























