
काठमाडौं । जेनजी आन्दोलनको क्रममा नेपाल प्रहरीले मानवीय मात्रै नभएर अभूतपूर्व भौतिक बेहोरेको छ ।
देशभर आन्दोलन तीव्ररुपमा फैलिँदा प्रहरी कार्यालयहरूमा तोडफोड, आगजनी र लुटपाट भएको थियो । भदौ २४ गतेको प्रदर्शनमा प्रहरीमाथि ठूलो आक्रमण भएको थियो ।
प्रहरीका संरचनामा आगजनी र तोडफोड गरिँदा ४ सयभन्दा बढी प्रहरी भवन क्षतिग्रस्त भएका छन् । प्रहरीका १ हजार १ सय थान हतियार लुटिएका छन् । प्रदर्शन पहिलो दिन अर्थात भदौ २३ गते केही प्रहरी सामान्य घाइते भएका थिए । दोस्रो दिन भदौ २४ गतेको हिंसात्मक प्रदर्शनले व्यापक क्षति पुर्याएको हो ।
सुरक्षाकर्मीको गोली लागेर नयाँ बानेश्वर र सुनसरीमा भदौ २३ गते २१ जनाको मृत्यु भएको थियो । प्रदर्शनकारीहरू संसद् भवन प्रवेश गरेका थिए । त्यसपछि प्रहरीले गोली चलाएको थियो । जिल्ला प्रशासन कार्यालयले कर्फ्यु लगाएर सेना नै परिचालन गरेको थियो ।
आन्दोलन रोक्न सुरक्षाकर्मीले गोली चलाए तापनि प्रदर्शनकारीहरूको आक्रोश कम भएको थिएन । प्रधानमन्त्री केपी शर्मा ओलीले भदौ २४ गते राजीनामा दिए पनि आन्दोलन थप उग्र रह्यो । दिउँसोदेखि राति १० बजेसम्म तोडफोड र आगजनी जारी रह्यो । त्यसपछि मात्र सेनाले सम्पूर्ण सुरक्षा कमान्ड हातमा लिएर फिल्डमा उत्रिँदा हिंसा केही कम भयो ।
देशभर ४ सय ४५ प्रहरी कार्यालयमा क्षति पुगेको प्रहरी प्रधान कार्यालयले जनाएके छ । त्यसमध्ये १ सय ९७ कार्यालय पूर्ण रूपमा ध्वस्त भएका छन् र मर्मत सम्भार गरेर प्रयोग गर्न सकिने अवस्था छैन ।
बाँकी २ सय ५८ कार्यालयमा आंशिक क्षति भएकोले मर्मत गरेर पुनः प्रयोग गर्न सकिने प्रहरीको भनाइ छ । काठमाडौं उपत्यकामा मात्र १ सय ५३ प्रहरी कार्यालयमा आगजनी र तोडफोड भएको छ । रानीपोखरीमा रहेको एआईजी बस्ने कार्यालयमा समेत आगो लगाइएको थियो ।
प्रहरीका सवारी साधनमा तोडफोड गरेर क्षति पुर्याइएको थियो । केही गाडीहरू जलेका छन् भने केही चोरी भएको अनुमान गरिएको छ । प्रदर्शनकारीहरूले हतियार पनि लुटेका थिए । पेस्तोल, बन्दुक र ग्यास गन गरेर करिब १ हजार १ सय थान हतियार लुटिएको नेपाल प्रहरीका सहप्रवक्ता एवं एसएसपी रमेश थापाले बताए ।
लुटिएकामध्ये नेपाली सेनाले करिब ३ सय थान हतियार बरामद गरेको छ । प्रहरीका अनुसार गोली र अश्रुग्यास पनि हराएको छ ।
देशभर प्रदर्शनको क्रममा १ हजार ९ सय ६३ प्रहरी घाइते भएको एसएसपी थापाले बताए । यसमध्ये १ हजार ९ सय ३९ जना उपचारपश्चात डिस्चार्ज भइसकेका छन् ।
घाइते प्रहरीमध्ये २४ जनाको अझै उपचार जारी छ । आन्दोलनको क्रममा ३ जना प्रहरी मारिएका थिए । अहिलेसम्म प्रहरी र प्रदर्शनकारी दुवैतर्फ मृत्यु हुनेको संख्या ७४ पुगेको प्रहरी प्रधान कार्यालयले जनाएको छ ।

























