
काठमाडौं । नक्कली भुटानी शरणार्थी प्रकरणको अनुसन्धान सुरु गरेका प्रहरी अधिकारी मनोज केसीलाई सरकारले केन्द्रीय अनुसन्धान ब्यूरो (सीआईबी)को प्रमुख बनाएर पठाएको छ ।
आइतबार बसेको मन्त्रिपरिषद् बैठकले प्रहरी अतिरिक्त महानिरीक्षक (एआईजी) केसीलाई सीआईबी प्रमुखको जिम्मेवारी सुम्पिने निर्णय गरेको हो । केसी तत्कालीन सत्ता गठबन्धनमा रहेको नेपाली कांग्रेसको दबाबका कारण अवधि पूरा नगरिकन जिम्मेवारीबाट हटाइएका थिए ।
उनी नेतृत्वको टोलीले पूर्वगृहमन्त्री बालकृष्ण खाँणसमेतलाई पक्राउ गरेको थियो । जसका कारण एमाले–कांग्रेस गठबन्धनको सरकारले उनलाई महत्वपूर्ण पोष्टिङ दिएको थिएन । हाल उनी प्रदेश समन्वय विभागमा कार्यरत थिए ।
केसी नेतृत्वको अपराध अनुसन्धान कार्यालयले २०७९ चैत १२ गते भुटानी शरणार्थी बनाएर अमेरिका पठाइदिन्छु भन्दै रकम असुली गरेको आरोपमा मोरङका केशव दुलाल, ललितपुरका सानु भण्डारी र पाँचथरका टेक गुरुङलाई पक्राउ गरेको थियो । दुलाल र भण्डारीको बयानबाट गृह मन्त्रालयका उच्च पदस्थ अधिकारीहरू पनि संलग्न रहेको खुलेको थियो ।
यसअघि सीआईबी प्रमुख रहेका चन्द्रकुबेर खापुङ प्रहरी महानिरीक्षक (आईजीपी) बनेका छन् । खापुङ आईजीपी बनेपछि सीआईबी कार्यवाहकको नेतृत्वमा सञ्चालन भइरहेको थियो ।

























