
काठमाडौं । काठमाडौंमा भएको जेनजी प्रदर्शनका क्रममा प्रहरीको हत्या गरेको आरोपमा प्रहरीले १ जना युवकलाई पक्राउ गरेको छ ।
काभ्रे घर भएका युवराज क्यापफाकी पक्राउ परेका हुन् । गत भदौ २४ गते महाराजगञ्जस्थित प्रहरी वृत्त अगाडि भएको प्रदर्शनमा आक्रमण हुँदा प्रहरी सहायक निरीक्षक (असई) मिलन राय र प्रहरी जवान उत्तम थापाको मृत्यु भएको थियो ।
घटनापछि संलग्न व्यक्तिहरूको पहिचानका लागि प्रहरीले सामाजिक सञ्जालमा सार्वजनिक भएका विभिन्न फुटेजहरू अध्ययन गरेको थियो । सोही आधारमा संलग्नमध्ये क्यापफाकीलाई पहिचान गरी नियन्त्रणमा लिइएको प्रहरीले जनाएको छ ।
जिल्ला प्रहरी परिसर भद्रकालीकी निमित्त प्रवक्ता डीएसपी पूर्णिमा चन्दका अनुसार क्यापफाकीविरुद्ध थप अनुसन्धान भइरहेको छ । घटनामा संलग्न अन्य व्यक्तिहरूको खोजी तीव्र पारिएको उनले बताइन् ।

























