जेनजीको धमास दिएर कर्मचारीलाई धम्क्याउँदै र राजीनामा माग्दै अभियुक्त

Share this
692shares
मुलुकी खबर
मुलुकी खबर
clock२०८२ असोज २८, मंगलबार १९:४८
arjun - 1

काठमाडौं । पछिल्लो समय ‘अनुगमन’ र ‘ज्ञापनपत्र बुझाउने’ नाममा जेनजी भन्दै सरकारी कार्यालयहरू धाउने केही समूहहरू सक्रिय बनेका छन् ।

तीमध्ये जेनजीको नाममा कार्यालय–कार्यालय पुग्ने एउटा टोली अहिले विशेष चर्चामा छ । यो टोलीका अगुवामध्ये हुन् अछामको पञ्चदेवल विनायक नगरपालिका–४ का २६ वर्षीय अर्जुनबहादुर शाही । उनी आफूलाई जनताको पक्षमा बोल्ने अगुवा भनेर प्रस्तुत गर्छन् । तर, वास्तवमा ठगी र चेक बाउन्सजस्ता आपराधिक मुद्दाका अभियुक्त रहेको खुलेको छ ।

शाहीको टोली नागरिक उड्डयन प्राधिकरण, नेपाल वायु सेवा निगमदेखि अख्तियार दुरूपयोग अनुसन्धान आयोगसम्म पुगेर ‘अनुगमन’ र ‘ज्ञापनपत्र बुझाउने’ नाममा धम्कीपूर्ण शैलीमा प्रस्तुत हुँदै आएको छ । सार्वजनिक भिडियोहरूमा उनी सरकारी अधिकारीहरूसँग ‘हात हल्लाउँदै, आवाज चर्क्याउँदै, राजीनामा दिनुस्, घरबाटै थुतेर ल्याउँछु’ जस्ता अभिव्यक्ति दिइरहेको देखिन्छन् ।

त्यही क्रममा उनी नागरिक उड्डयन प्राधिकरण पुगेका थिए । त्यहाँ महानिर्देशक प्रदीप अधिकारीलाई प्राधिकरण किन घाटामा गइरहेको छ ? भनेर सोध्दै उनले राजीनामा मागे । अधिकारीले संयमित ढंगमा जवाफ दिँदै तथ्य बुझाउन खोजे पनि शाही बारम्बार उत्तेजित हुँदै ‘ठाउँ खाली गर्नुस्, अर्को मान्छे आउँछ काम गर्न’ भन्दै धम्क्याउँछन् । अधिकारीले शान्त मुद्रामा ‘सरकारले हटाओस् न त’ भन्ने जवाफ दिएको भिडियोमा सुन्न सकिन्छ ।

यही शैलीमा शाही नेपाल वायु सेवा निगम पुगे । त्यहाँ उनले निगमका अध्यक्ष युवराज अधिकारीलाई बोलाउन लगाउँदै ‘नत्र घरबाट थुतेर ल्याउँछु’सम्म भने । ज्ञापनपत्र बुझाउन आएको भन्दै उनले निगमका कर्मचारीहरूसँग अस्वभाविक व्यवहार गरे । अधिकारी तल झरेपछि पनि शाही आक्रोशित मुद्रामा रहे र ‘काम गर्न नसक्ने मान्छे किन बस्ने’ भन्दै अपमानजनक ढंगमा प्रस्तुत भए ।

त्यसपछि शाहीको टोली अख्तियार दुरूपयोग अनुसन्धान आयोगको केन्द्रीय कार्यालय टंगाल पुग्यो । त्यहाँ पनि उनीहरूले उस्तै शैलीमा कर्मचारीहरूलाई निर्देश दिए र प्रमुख आयुक्तसँग तत्काल भेटको माग गरे । कर्मचारीले निर्धारित समयपछि भेट हुने बताएपछि उनी आक्रोशित बने र भने, ‘हामी विथआउट टाइमिङ आएका हौं, १२ वटा संवैधानिक निकायमा पुगिसकेका छौं, अख्तियारमा मात्रै किन भेट्न नमिल्ने ?’

उनको व्यवहारले सरकारी निकायहरूमा धम्की र आक्रोशको वातावरण सिर्जना गरेको देखिन्छ । तर, सबैभन्दा रोचक पक्ष के छ भने कार्यालयमा ‘अनुगमन र सुधार’को नाममा पुगेका उनै शाहीमाथि ठगी र बैंकिङ कसुरका उजुरीहरु दर्ता छन् ।

श्रीकृष्ण फुयालले प्रहरी वृत्त महाराजगञ्जमा उनलाई चेक बाउन्सको अभियोगमा उजुरी दिएका छन् । फुयालका अनुसार शाहीले ‘रेड स्टार प्रोडक्सन एन्ड मिडिया हाउसको नाम’मा कम्प्युटर र क्यामेरा लिएर गएका थिए । त्यसको सट्टा ३ लाख ८० हजार रुपैयाँका ३ वटा चेक दिए । तर, खातामा रकम नहुँदा चेक साटिएन । त्यसपछि रेड स्टारको खाता नै कालोसूचीमा परेको थियो र फुयालले प्रहरीमा उजुरी दिएका थिए ।

महाराजगञ्ज वृत्तमै रोजिना थापा नामकी महिलाले पनि शाहीविरुद्ध चेक बाउन्सको उजुरी दर्ता गरेकी थिइन् । शाहीले सिटिजन्स बैंकको खाताबाट १० लाख ३० हजार रुपैयाँको चेक दिएका थिए । तर, रकम नभएकाले त्यो पनि साटिएन । प्रहरीको सीआरएस (क्रिमिनल रेकर्ड सिस्टम)बाट २०८१ पुस २३ गते बौद्ध प्रहरीमा समेत ७ लाख रुपैयाँ बराबरको अर्को चेक बाउन्स उजुरी परेको पत्ता लाग्यो ।

त्यति मात्र होइन, शाही वैदेशिक रोजगारी ठगीको अभियोगमा समेत पक्राउ परिसकेको पत्ता लागेको छ । काठमाडौं उपत्यका अपराध अनुसन्धान कार्यालयको ललितपुर शाखाले उनलाई २०८२ साल वैशाख २८ गते विभिन्न युवायुवतीलाई ‘जापान पठाइदिन्छु’ भन्दै ८ लाख रुपैयाँ ठगी गरेको आरोपमा पक्राउ गरेको थियो ।

अर्जुनबहादुर शाही ।

वैदेशिक रोजगार विभागका सूचना अधिकारी टीकाराम ढकालका अनुसार उनी त्यतिबेला अस्पतालमा भर्ना हुने बहानामा प्रक्रिया ढिलो गराएर पछि पीडितलाई रकम फिर्ता गर्ने सहमति जनाए र धरौटीमा छुटे । सुवास तामाङ नाम गरेका व्यक्तिले उनलाई वैदेशिक ठगीको उजुरी दिएका थिए । त्यस्तै, विद्या श्रेष्ठ नामकी महिलाले पनि प्रहरी वृत्त स्वयम्भूमा १० लाख रुपैयाँ सापटी लगेर फिर्ता नगरेको र त्यसको चेक नसाटिएको भन्दै उजुरी दर्ता गरेकी छिन् ।

यो सबै आपराधिक पृष्ठभूमि हुँदाहुँदै पनि शाही अहिले विभिन्न कार्यालय धाउँदै सरकारी अधिकारीहरूलाई धम्क्याउने, निर्देशन दिने र राजीनामा माग्ने जस्ता हर्कत गरिरहेका छन् । उनीबाट पीडित भएकाहरू भने ‘ठगी गरेर धरौटीमा छुटेको मान्छेलाई सरकारले नै ‘रेड कार्पेट’ ओच्छ्याएको छ’ भन्दै न्याय पाउनेमा सशंकित बनेका छन् ।

२०५५ साल मंसिर ८ मा जन्मिएका शाहीको राजनीतिक यात्रा पनि रोचक छ । नेकपा (एमाले)का नेता सुवास नेम्वाङको निधनपछि रिक्त भएको इलाम क्षेत्र नम्बर २ मा भएको उपनिर्वाचनमा शाहीले स्वतन्त्र उम्मेदवारका रूपमा भाग लिएका थिए । उनी त्यतिबेला २५ वर्ष पूरा गरेर उम्मेदवार बन्न पाएका थिए । उनको चुनाव चिह्न ‘डोजर’ थियो । तर, निर्वाचनमा एमालेका सुहाङ नेम्वाङ )सुवास नेम्वाङका छोरा) २७ हजार ७ सय ७२ मत ल्याएर विजयी हुँदा शाहीले जम्मा ५५ मत मात्र पाएका थिए ।

जेनजी आन्दोलनपछि पूर्वप्रधानन्यायाधीश सुशीला कार्की प्रधानमन्त्री बन्ने भएपछि शीतल निवासमा पुगेर उनले जेनजी अगुवा सुदन गुरुङसँगै हात उठाउँदै समर्थन जनाएका दृश्यहरू सार्वजनिक भएका थिए । त्यही आन्दोलनको धमासमा अहिले उनले आफूलाई ‘जनताको प्रतिनिधि’का रूपमा देखाउँदै कार्यालय–कार्यालय घुमिरहेका छन् ।

जेनजीको धमास दिएर कर्मचारीलाई धम्क्याउने र राजीनामा माग्नेजस्ता हर्कत गरिरहेका छन् । तर, उनीविरुद्धको उजुरी अनुसन्धानकै क्रममा छन् । मुद्दा अदालतमा विचाराधीन छन् । वैदेशिक ठगीमा पक्राउ परेर धरौटीमा छुटेका, बैंकिङ कसुरमा उजुरी परेका र पीडितहरूलाई पैसा नतिरेका अर्जुनबहादुर शाही अहिले पनि स्वतन्त्र रूपमा घुम्दै अनुगमनको नाममा कर्मचारीहरुलाई सार्वजनिक धम्की दिइरहेका छन् ।

राज्यका संवैधानिक निकाय र सरकारी संस्थामा उनले प्रदर्शन गरेको व्यवहारले प्रशासनिक मर्यादा, कर्मचारीको सम्मान र कानुनी शासनप्रति नै प्रश्न उठाएको छ । पीडितहरूले भने ठग र अभियुक्तहरूलाई जेनजीको नाममा नायक बनाउने प्रवृत्तिले न्याय नै कमजोर बनाइरहेको गुनासो गरेका छन् । ‘वैदेशिक ठगी र बैंकिङ कसुरका अनेक अभियोग झेलिरहेको व्यक्ति अहिले सरकारी निकायहरूमा ‘राजीनामा दिनुस्, होइन भने थुतेर ल्याउँछु’ भनी धम्क्याउँदै हिँड्छ । यही हो अहिलेको विडम्बना,’ प्रहरीका १ जना अधिकारीले भने ।

तपाइको प्रतिक्रिया
शीर्ष नेताको सम्बोधन, रित्तो दर्शक दीर्घा: मोरङमा कांग्रेस इतर पक्षको अधिवेशन
बहिरा फुटबल टोली दक्षिण कोरिया जाने
मत्स्यपोखरीमा चार दिन पर्यटन, संस्कृति र साहित्यको उत्सव
राप्रपामा अध्यक्षका लागि आधा दर्जन नेताको दौडधुप, लिङ्देनलाई चुनौती
लुम्बिनीले टस जितेर बलिङ रोज्दा सुदूरपश्चिम पहिले ब्याटिङ गर्दै
विराटनगरमा कर दिवस मनाइयो, करदातामैत्री प्रणालीमा जोड
प्रहरीको नाममा भ्रामक सूचना फैलाउने दुई जना नियन्त्रणमा पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
नोबेल मेडिकल कलेज छैटौँ पटक उत्कृष्ट करदाता सम्मानबाट सम्मानित
रुसी खगोल विज्ञान ओलम्पियाडमा एभरेस्टकी स्नेहालाई कांस्य
© 2024 Muluki Khabar. All Rights Reserved. Design & Develop By: Indesign Media Pvt. Ltd.