सांकेतिक तस्बिरसप्तरी । सप्तरीको बोदेबर्साइन नगरपालिका–८, काचनको रजकपट्टीस्थित कबिर बाबा मन्दिरका पुजारी रामदुलार साहको हत्या भएको छ। ७३ वर्षीय पुजारी साहको आज (आइतबार) बिहान २ बजेतिर अज्ञात समूहले गोली प्रहार गरी हत्या गरेको हो।
गाउँको पूर्वपट्टि रहेको मन्दिरमा कुटी बनाएर एक्लै बस्दै आएका पुजारीलाई सडकमा निकालेर पछाडिबाट गोली हानिएको स्थानीयले बताएका छन्। घटनाको जानकारी पाएलगत्तै प्रहरीको टोली घटनास्थल पुगेर अनुसन्धान सुरु गरेको छ।
घटनास्थलबाट प्रहरीले गोलीका दुईवटा खोका फेला पारेको छ। शव परीक्षणका लागि धरानस्थित बिपी कोइराला स्वास्थ्य विज्ञान प्रतिष्ठान पठाइएको छ। जिल्ला प्रहरी कार्यालय सप्तरीका प्रमुख प्रहरी उपरीक्षक गौतमकुमार केसीका अनुसार सीमावर्ती क्षेत्रमा शङ्कास्पद व्यक्तिहरूमाथि जाँच तीव्र पारिएको छ।

























