
काठमाडौँ । भदौ अन्तिम साता भएको जेनजी आन्दोलनका क्रममा आगजनी र लुटपाटमा संलग्न आरोपमा १ जना पूर्वसैनिक पक्राउ परेका छन् । भदौ २४ मा बानेश्वरस्थित ग्लोबल कलेज र प्र्रहरी वृत्त गौशालामा आगजनी गरेको आरोप उनीमाथि लागेको छ ।
पक्राउ पर्नेमा कञ्चनपुरको बेलौरी नगरपालिका वडा नम्बर–१ घर भएर धापासी बस्दै आएका २७ वर्षीय भुवन शाही छन् ।
उनलाई सोमबार नयाँ बानेश्वर क्षेत्रबाट पक्राउ गरिएको जिल्ला प्रहरी परिसर काठमाडौँका एसपी पवन भट्टराईले जानकारी दिए । प्रहरीका अनुसार प्रहरी वृत्त गौशालामा तोडफोड, आगजनी र लुटपाटमा उनी संलग्न रहेको प्रहरीको अनुसन्धानबाट खुलेको छ ।
२०७४ मा नेपाली सेनामा भर्ना भएका उनी बर्खास्तीमा परेका थिए । नक्कली चालक अनुमति पत्र पेस गरेर सेवा प्रवेश गरेको भेटिएपछि जङ्गी अड्डाले उनलाई २०७५ मा बर्खास्त गरेको थियो । आन्दोलनमा उनले लुटेको प्रहरीको राइट कन्ट्रोल गियरको हातमा लगाउने भाग र ग्लोबल कलेजको ट्रफी २ थान प्रहरीले बरामद गरेको छ ।

























