
विराटनगर । झापा, मोरङ, सुनसरी, धनकुटा र उदयपुरमा प्रहरीले शुक्रबार एकै दिन ठूलो परिमाणको लागू औषध र प्रतिबन्धित औषधसहित ६ जनालाई पक्राउ गरेको छ । सुनसरीको बर्जुबाट २ सय ५७ किलोभन्दा बढी गाँजा बरामद भएको छ ।
झापाको भद्रपुर नगरपालिका–५ बाट लागू औषध ब्राउन सुगरसहित दुई जना पक्राउ परेका छन् । भद्रपुर नगरपालिका–७ का २६ वर्षीय विशाल माझीलाई ३ ग्राम ६०० मिलिग्राम र बिर्तामोड नगरपालिका–१० का २२ वर्षीय रोहित कटुवाल लाई १ ग्राम १११ मिलिग्राम ब्राउन सुगरसहित नियन्त्रणमा लिइएको प्रहरीले जनाएको छ ।
यसैगरी, मोरङ, धनकुटा र उदयपुरबाट प्रतिबन्धित औषधसहित ४ जनालाई प्रहरीले पक्राउ गरेको छ ।
मोरङको बेलबारी नगरपालिका–१ मा ३२ वर्षीय विज्ञान राईले आफ्नो घरमा लागू औषध बिक्री वितरण गरिरहेको विशेष सूचनाका आधारमा इलाका प्रहरी कार्यालय बेलबारीको टोलीले छापा मारेको थियो । प्रहरीले राईलाई उनको घरबाटै ट्रामाडोल ४७० चक्की, डिक्लो ४७० ट्याब्लेट र १८० ग्राम गाँजासहित पक्राउ गरेको छ ।
त्यस्तै, धनकुटा नगरपालिका–६ बाट प्रहरीले तिलक भुजेल र मौसम राई लाई ट्रामाडोल ११० क्याप्सुल, स्पास्पेन ८६ ट्याब्लेट र डिकोलिक १८ ट्याब्लेटसहित नियन्त्रणमा लिएको छ।
उदयपुरको कटारी नगरपालिका–४ मा पनि इलाका प्रहरी कार्यालय कटारीले ३१ वर्षीय जित बहादुर थापा मगर लाई १९० ट्याब्लेट प्रतिबन्धित लागू औषधसहित पक्राउ गरेको जनाएको छ।
सुनसरीको बर्जु गाउँपालिका–५ स्थित भित्री सडक खण्डबाट प्रहरीले ठूलो परिमाणमा लागू औषध गाँजा बरामद गरेको छ । इलाका प्रहरी कार्यालय दुहबी र सितागंजबाट खटिएको संयुक्त टोलीले बागमती प्रदेश–०१–०२७ च ०२४० नम्बरको स्कार्पियो गाडीबाट २ सय ५७ किलो ४५ ग्राम गाँजा बरामद गरेको हो ।
गाडी चालक भने फरार रहेकाले उनको खोजी तथा अनुसन्धान भइरहेको प्रहरीले जनाएको छ । पक्राउ परेका सबैको थप अनुसन्धान भइरहेको प्रहरीले जनाएको छ।

























