
विराटनगर । झापामा जेनजी आन्दोलनको मौका छोपेर प्रहरी हिरासतबाट भागेका थुनुवा आइतबार बिहान आफैं सम्पर्कमा आएका छन् ।
झापाको कचनकवल गाउँपालिका–६ घर भई काठमाडौंको दक्षिणकाली नगरपालिका–३ फर्पिङ बस्दै आएका १८ वर्षीय अशोक रिमाल गत भदौ २४ गते भागेका थिए । इलाका प्रहरी कार्यालय झिलझिलेको हिरासतबाट भागेका उनीमाथि प्रहरीले सवारी अंगभंग मुद्दा चलाउन अनुसन्धान गरिरहेको थियो ।
अनुसन्धान जारी रहेका बेला जेनजी आन्दोलनको मौका छोपेर उनी भदौ २४ गते फरार भएका थिए । रिमाल आइतबार बिहान ९ः३० बजेतिर आफैं सम्पर्कमा आएको झापा प्रहरीका प्रवक्ता डीएसपी खगेन्द्रबहादुर खड्काले बताए ।
उनका अनुसार प्रहरीको सम्पर्कमा पुगेका रिमाललाई हिरासतमा राखेर थप अनुसन्धान अघि बढाइएको छ । सवारी दुर्घटना गराएको घटनामा प्रहरीले अनुसन्धान गरिरहेका बेला रिमाल भागेका थिए ।

























