
विराटनगर । जिल्ला प्रहरी कार्यालय मोरङले ५ हजार ५ केजीभन्दा बढी गाँजा नष्ट गरेको छ । विभिन्न मितिमा बरामद भएको पाँच हजार ५ सय २७ भन्दा किलो गाँजा शुक्रबार प्रहरी कार्यालयको हाताभित्रै नष्ट गरेको हो ।
बरामद गरिएको गाँजा खाल्डो खनेर नष्ट गरेको मोरङ प्रहरी प्रमुख एसपी कवित कटवालले जानकारी दिए । उनका अनुसार जलाउँदा वातावरणमा असर गर्ने भएकाले खाल्डो खनेर गाडिएको हो ।
‘जलाएर नष्ट गर्दा वातावरणमा प्रभाव पर्नुका साथै स्थानीयवासीलाई धूँवाले समस्या गरेको गुनासो आएपछि खाल्डो खनेर पुरी नष्ट गरेका हौं,’ उनले भने,‘बाहिर जलाउँदा र खाल्डोभित्र पुरेर छाड्दा केही व्यक्तिले खनेर लैजाने गरेको भेटिएपछि कार्यालय हाताभित्रै नष्ट गरिएको हो ।’
कोशी प्रदेशको पहाडी क्षेत्र धनकुटा, भोजपुरमा व्यसायिक रुपमा गाँजा खेताी हुने र त्यहाँबाट तस्करी हुँदै मोरङ, सुनसरी र झापाको सीमा भएर भारत जाने गरेको छ । प्रहरीले सीमा क्षेत्रबाट गाँजा बरामद गर्दै आएको छ ।
गाँजा नेपाली बजारमा सस्तोमा बिक्री हुन्छ । भारतमा पुगेपछि महंगो मूल्यमा बिक्री हुन्छ ।

























