
विराटनगर । सुनसरीको इटहरीबाट लागुऔषध खैरो हेरोइन (ब्राउन सुगर)सहित २ जना भारतीय नागरिक पक्राउ परेका छन् ।
भारतको अररिया फारवेशगन्जका ३० वर्षीय सुरजकुमार सोनार र २५ वर्षीय केशवकुमार ठाकुर पक्राउ परेका हुन् । उनीहरुलाई इलाका प्रहरी कार्यालय इटहरीबाट खटिएको टोलीले मंगलबार साँझ कोशी लोकमार्गअन्तर्गत इटहरी उपमहानगरपालिका–२ बाट पक्राउ गरेको हो ।
पक्राउ परेकाको साथबाट १३.४४ ग्राम खैरो हेरोइन बरामद भएको सुनसरी प्रहरीले जनाएको छ । उनीहरुले प्रयोग गर्ने बीआर ३८ टी ३५९६ नम्बरको मोटरसाइकलसमेत प्रहरीले नियन्त्रणमा लिएको छ ।
पक्राउ परेकालाई इलाका प्रहरी कार्यालय इटहरीको हिरासतमा राखिएको छ । उनीहरुविरुद्ध लागुऔषध ऐनअन्तर्गतको मुद्दा चलाउन अदालतबाट म्याद थप गरेर अनुसन्धानको बाँकी प्रक्रिया अघि बढाइएको जानकारी प्रहरीले दिएको छ ।

























