
विराटनगर । काठमाडौंको सुन्धारास्थित केन्द्रीय कारागारबाट फरार भएका एक कैदीको भारतमा मृत्यु भएको छ ।
जबरजस्ती करणी मुद्दामा कैद सजाय भुक्तान गरिरहेका झापाको बिर्तामोड नगरपालिका वडा नं. ३ निवासी ४० वर्षीय आलम मियाको भारतको हिमाञ्चल प्रदेशमा मृत्यु भएको हो ।
जेनजी आन्दोलनका क्रममा गत भदौ २४ गते केन्द्रीय कारागारबाट मिया फरार भएका थिए ।
अदालतको फैसला अनुसार जबरजस्ती करणी कसुरमा विगत ४ वर्षदेखि जेल जीवन बिताइरहेका उनी फरार भएपछि भारत पुगेका थिए । भारतको हिमाञ्चल प्रदेशस्थित पानी प्रशोधन कम्पनीमा काम गरिरहेकै अवस्थामा गत पुस १० गते मिया अचानक बेहोस भएर ढलेका थिए । तत्काल उपचारका लागि अस्पताल लगिए पनि उपचारकै क्रममा उनको मृत्यु भएको आफन्तले जनाएका छन् ।
मृतकको शवलाई उनका आफन्तले भारतको गलगलिया हुँदै नेपालको भद्रपुर सिमानाकाबाट बिर्तामोड ल्याएका छन् ।
झापाका प्रहरी नायब उपरीक्षक (डीएसपी) खगेन्द्र खड्काले फरार कैदीको मृत्यु भएको र शव नेपाल ल्याइएको पुष्टि गर्दै यसबारे थप बुझ्ने कार्य भइरहेको जानकारी दिए ।

























