
विराटनगर । ओखलढुंगामा छोटो समयको अन्तरालमै भएका २ वटा अत्यन्तै क्रूर र योजनाबद्ध हत्या तथा लुटपाटको घटनामा संलग्न गिरोहलाई प्रहरीले पक्राउ गरेको छ ।
शृङ्खलाबद्ध हिसाबले गरिएको बीभत्स हत्या र लुटपाटका घटनामा संलग्न संगठित गिरोहलाई पक्राउ गर्दै प्रहरीले घटनाको भयावह विवरण आइतबार सार्वजनिक गरेको छ । पक्राउ परेको गिरोहले १ जना एकल महिला र किराना पसल सञ्चालन गर्दै आएका दम्पतीको निर्ममतापूर्वक हत्या गरेको पुष्टि भएको कोशी प्रदेशका प्रहरी प्रवक्ता एसएसपी दीपक पोखरेलले बताए ।
एकल महिला र किराना पसल सञ्चालक दम्पतीको हत्यामा संलग्नको खोजीका लागि नेपाल प्रहरीको केन्द्रीय अनुसन्धान ब्युरो (सीआईबी), कोशी प्रदेश प्रहरी कार्यालय विराटनगर र जिल्ला प्रहरी कार्यालय ओखलढुंगाको संयुक्त टोली परिचालित थियो । प्रहरीको संयुक्त टोलीले शृङ्खलाबद्ध हत्या र लुटपाटमा संलग्न गिरोहका ४ जनालाई पक्राउ गरेको जानकारी एसएसपी पोखरेलले दिए ।
उनका अनुसार चिशंखुगढी गाउँपालिका–३ दियालेका २८ वर्षीय मिलन भनिने संगम राई, चिशंखुगढी–४ रातमाटेका ३० वर्षीय विनोद राई, ३० वर्षीय प्रकाश भुजेल र चिशंखुगढी–८ माम्खाका ३० वर्षीय दोर्जे भनिने अशोक भुजेललाई पक्राउ गरिएको हो । पक्राउ परेकाविरुद्ध कर्तव्य ज्यान, डाँका तथा हातहतियार खरखजना मुद्दा चलाउन प्रहरीले अदालतबाट म्याद थप गरेर अनुसन्धानको बाँकी प्रक्रिया अघि बढाएको छ ।
पक्राउ परेको गिरोहले सुरुमा गत असोज २६ गते राति करिब १० बजेतिर एकल महिलाको हत्या गरेको प्रहरीको प्रारम्भिक अनुसन्धानबाट खुलेको छ । सिद्धिचरण नगरपालिका–४ चार्खुमा खेतीकिसानी गरेर एक्लै जीवनयापन गर्दै आएकी ५२ वर्षीया रत्नकुमारी कटवाल (कार्की)लाई हतियारधारी समूहले घरमै आक्रमण गरेको थियो ।
बन्चरोले दाहिने कन्चट र कानको भागमा प्रहार गर्दै अत्यन्तै क्रूर तरिकाले उनको हत्या गरिएको प्रहरीले जनाएको छ । हत्या पश्चात् घरमा रहेको नगद र सुनका गरगहना लुटेर घटनामा संलग्नहरु फरार भएका थिए ।
स्थानीयले असोज २७ गते घटनाको जानकारी दिएपछि प्रहरीले अनुसन्धान सुरु गरेको थियो । एकल महिला, ग्रामीण परिवेश र रातको समयमा गरिएको हत्याले जिल्लाभर त्रासको वातावरण सिर्जना गरेको थियो ।
यस घटनाको अनुसन्धान चलिरहेकै बेला अर्को दोस्रो र झनै डरलाग्दो घटना यही पुस १५ गते बिहान चिशंखुगढी गाउँपालिका–६ भदौरे गैरीगाउँमा भयो । किराना पसल सञ्चालन गर्दै आएका ६० वर्षीय शोभितमान थापामगर र उनकी पत्नी ६० वर्षीया रत्नमाया थापामगर हतियारधारी समूहको निशानामा परेका थिए ।
बिहान करिब ८ बजेतिर कोदालो तथा अन्य धारिला हतियारले दाहिने कन्चट र कानको भागमा प्रहार गर्दै दुवै जनाको निर्ममतापूर्वक हत्या गरिएको प्रहरीले जनाएको छ । प्रहरीका अनुसार हत्या पश्चात् गोठमा लगेर स्याउलाले छोपिएको अवस्थामा शव फेला परेको थियो ।
पसल सञ्चालक दम्पतीको हत्यापछि किराना पसल र कोठामा रहेको करिब १ लाख रुपैयाँ नगद तथा गरगहना र काँचो सुनसमेत गरी करिब ६ तोला सुन लुटेर गिरोह फरार भएको पाइएको एसएसपी पोखरेलले बताए । स्थानीयले खबर गरेपछि प्रहरीले घटनाको अनुसन्धान सुरु गरेको थियो ।
दुवै घटनाको प्रकृति, हत्या गर्ने तरिका, प्रयोग भएका हतियार र लुटपाटको उद्देश्य मिल्दोजुल्दो देखिएपछि प्रहरीले शृङ्खलाबद्ध अपराधको आशंकामा अनुसन्धान अघि बढाएको थियो । त्यसैका आधारमा सीआईबीसँगको समन्वयमा व्यापक खोजतलास सुरु गरियो ।
हत्यामा संलग्नलाई पुस १७ र १८ गते ओखलढुंगाका विभिन्न स्थानबाट पक्राउ गर्न प्रहरी सफल भएको हो । प्रहरीले हत्यामा प्रयोग भएका हतियार र लुटिएका सामग्रीहरू समेत बरामद गरेको छ ।
चार्खु घटनास्थलबाट हत्यामा प्रयोग गरिएको एउटा बन्चरो तथा दापसहितको एउटा खुकरी बरामद गरिएको छ भने रत्नकुमारीको हत्यापछि लुटिएको सुन पगालेर बनाइएको ५.८० ग्रामको १ थान औंठी फेला परेको प्रहरीले जनाएको छ ।
भदौरे गैरीगाउँस्थित शोभितमानको किराना पसलबाट लुटिएको १ सय रुपैयाँको रिचार्ज कार्ड, २ नाल भरुवा बन्दुक र ४ थान मोबाइल फोन हत्यामा संलग्नको साथबाट बरामद गरिएको जानकारी प्रहरीले दिएको छ । प्रहरीका अनुसार बरामद भएका सामग्रीले अपराध योजनाबद्ध ढंगले गरिएको पुष्टि हुन्छ ।
पक्राउ परेकाहरु स्थानीय भूगोल र बस्तीको अवस्थासँग परिचित भएकै कारण अपराध सफल बनाउन सहज भएको प्रहरीको प्रारम्भिक निष्कर्ष छ । प्रहरीका अनुसार हत्या र लुटपाटमा संलग्नविरुद्ध मुलुकी अपराध संहिताअन्तर्गत कर्तव्य ज्यान, डाँका तथा हातहतियार खरखजना सम्बन्धी कसुरमा मुद्दा चलाइनेछ ।
कर्तव्य ज्यानतर्फ क्रूर यातना दिई वा निर्ममतापूर्वक ज्यान मारेको ठहर भएमा जन्मकैदसम्मको सजाय हुन सक्ने कानुनी व्यवस्था छ । डाँकाको कसुरमा ७ वर्षदेखि १४ वर्षसम्म कैद र जरिबानाको प्रावधान रहेको छ । अवैध हातहतियार राखेको र प्रयोग गरेको अभियोगमा थप कैद तथा जरिबाना हुन्छ ।
नगद र सुनका गरगहना रहेको सूचनाकै आधारमा लुटपाट एवं डकैती गर्ने उद्देश्यले हत्या गरिएको देखिने प्रहरीको भनाइ छ । लुटपाटका लागि व्यक्तिको ज्यानै लिने अपराध समाजका लागि चिन्ताजनक विषय भएको प्रहरीको विश्लेषण छ ।
एसएसपी पोखरेलले घटनाको विस्तृत अनुसन्धान भइरहेको बताए । अनुसन्धान सकिएपछि घटनासँग सम्बन्धित थप कुरा पत्ता लाग्ने उनको भनाइ छ ।

























