
झापा । झापाको बिर्तामोडबाट प्रहरीले ठुलो परिमाणको लागू औषध ब्राउन सुगरसहित एक जनालाई पक्राउ गरेको छ। बिर्तामोड नगरपालिका–१ बाट ४० वर्षीय अजय राजवंशीलाई प्रहरीले नियन्त्रणमा लिएको हो।
इलाका प्रहरी कार्यालय अनारमनी र लागू औषध नियन्त्रण ब्युरो काँकडभिट्टाको संयुक्त टोलीले मंगलबार चेकजाँच गर्ने क्रममा उनलाई पक्राउ गरेको हो। उनको साथबाट १२३ ग्राम १८० मिलिग्राम ब्राउन सुगर बरामद भएको प्रहरीले जनाएको छ।
पक्राउ परेका राजवंशीलाई अहिले इलाका प्रहरी कार्यालय अनारमनीमा राखेर थप अनुसन्धान अघि बढाइएको छ। झापामा पछिल्लो समय लागू औषध विरुद्धको सक्रियता बढाइएको प्रहरीको भनाइ छ।

























