
विराटनगर । विराटनगरको एक गजल रेस्टुरेन्टमा किशोरीलाई बन्धक बनाएर यौन कार्यमा लगाउने र शारीरिक यातना दिने २ जनालाई प्रहरीले पक्राउ गरेको छ। विराटनगर–११ रोडशेषमा रहेको ‘भिन्तुना गीतगजल’का सञ्चालक र त्यहाँ कार्यरत एक कर्मचारीलाई प्रहरीले नियन्त्रणमा लिएको हो।
पक्राउ पर्नेहरूमा विराटनगर–१२ का ३३ वर्षीय सञ्चालक परशुराम कामत र विराटनगर–८ का २६ वर्षीय मनिष ठाकुर रहेका छन्। झापा कनकाई नगरपालिकाकी १६ वर्षीया किशोरीलाई विगत ५ महिनादेखि सो गजलमा काम लगाइएको थियो।
सञ्चालक र कर्मचारी मिलेर उनलाई भारतीय नागरिकहरूसँग यौन क्रियाकलाप गर्न लगाएको र एउटा कोठामा राखी शारीरिक यातना समेत दिएको प्रहरीले जनाएको छ। पीडितको उद्वार गरी उनले दिएको लिखित जाहेरीका आधारमा पुस २१ गते उनीहरूलाई पक्राउ गरिएको हो।
जिल्ला प्रहरी कार्यालय मोरङले उनीहरूमाथि मानव बेचबिखन तथा शरीर बन्धक कसुरमा म्याद थप गरी थप अनुसन्धान अघि बढाएको छ।

























