पथरीशनिश्चरेमा शिक्षकको कुटाइबाट छात्रा घाइते

मुलुकी खबर

२०८१ भाद्र १३, बिहीबार २०:००

विराटनगर। मोरङको पथरीशनिश्चरेमा शिक्षकको कुटाइबाट बिहीबार एक जना विद्यार्थी घाइते भएकी छन् ।

पथरीशनिश्चरे नगरपालिका–९ मा रहेको श्री सिंहवाहिनी माध्यमिक विद्यालयका शिक्षक पवन राईले कुटपिट गर्दा कक्षा १० अध्ययनरत १७ वर्षीया जस्ना राई घाइते भएकी हुन् । सुरुमा कक्षा कोठामा विद्यार्थीबीच विवाद भएको थियो ।

विवाद मिलाउने क्रममा शिक्षकसँग पनि विवाद गरेको भन्दै दिउँसो ४ बजेतिर छात्रालाई कुटपिट गरिएको प्रहरीले जनाएको छ । शिक्षक पवनले प्लाष्टिकको पाइपले कुट्दा विद्यार्थी घाइते भएको इलाका प्रहरी कार्यालय पथरीका डीएसपी मोहनविक्रम दाहालले बताए ।

उनका अनुसार घाइते छात्राको पाखुरामाथिको पातामा चोट लागेको छ । उनलाई उपचारका लागि पथरी अस्पतालमा भर्ना गरिएको र अवस्था सामान्य रहेको प्रहरीले जनाएको छ ।

छात्रालाई कुटपिट गर्ने शिक्षकलाई प्रहरीले नियन्त्रणमा लिएको छ । घटनाको थप अनुसन्धान भइरहेको जानकारी डीएसपी दाहालले दिए ।

प्रकाशित मिति: २०८१ भाद्र १३, बिहीबार २०:००