२ छोरीको शवसँगै भेटियो आमाको मोबाइल, कहाँ गइन् अस्मिता ?

Share this
688shares
मुलुकी खबर
मुलुकी खबर
clock२०८१ भदौ १८, मंगलबार १९:२०

विराटनगर । मोरङको सुन्दरहरैँचा नगरपालिका–७ स्थित केरा बगानभित्र २ जना नाबालिका मृत फेला परेको घटना थप रहस्यमय बन्दै गएको छ ।

आमाले सँगै लिएर गएको भनिएका २ नाबालिका छोरी गत आइतबार दिउँसो मृत फेला परेका थिए । तर, आमाको अवस्था अहिलेसम्म अज्ञात छ । स्थानीयको सहयोगमा प्रहरीले खोजी जारी राखेको छ ।

धनकुटाको पाख्रिबास नगरपालिका–४ डिकुरे घर भइ सुन्दरहरैँचा–७ मा बस्दै आएका अर्जुन कार्कीका नाबालिकाहरु छोरीहरु १ वर्षीया आइका र ३ वर्षीया अर्पणा कार्की स्थानीय नारायण न्यौपानेको केराघारीभित्र मृत फेला परेका थिए । नाबालिका छोरीलाई पत्नी अस्मिता न्यौपानेले सँगै लिएर गएको अर्जुनले बताएका छन् ।

पत्नी र २ छोरीसहित सुन्दरहरैँचा–७ मालती टोलस्थित दिदी सीता रेग्मीको घरमा अर्जुन बस्दै आएका थिए । नजिकै नयाँ घर पनि बनाउँदै थिए । प्रहरीका अनुसार अर्जुनको इटहरी–भोजपुर चल्ने ट्याक्सी छ । ट्याक्सी लिएर भोजपुर गएका उनी ३ दिनपछि फर्किएका थिए ।

भोजपुरबाट फर्किएपछि निर्माणाधीन घरमा पानी लगाउने विषयमा अर्जुन र पत्नी अस्मिताबीच विवाद भएको र त्यसपछि २ जना नाबालिका छोरीलाई लिएर अस्मिता शनिबार साँझदेखि हिँडेको जानकारी प्रहरीले पाएको छ । नाबालिकाहरु भोलिपल्ट मृत फेला परेका हुन् ।

अर्जुनले भोजपुरबाट आउँदा माछा पनि लिएर आएका थिए । ‘पत्नीसँग विवाद भएपछि माथि चढेर म माछा पकाउन थालें । पकाएर खान बोलाउँदा उनी (अस्मिता) थिइनन् । छोरीहरु पनि लिएर गइछन्,’ उनको भनाइ उद्रित गर्दै प्रहरीले भन्यो, ‘त्यसपछि फोन गर्दा उठेन । रातभर खोजी गरियो । तर, पत्ता लगाउन सकिएन ।’

प्रहरीका अनुसार अस्मिताले ‘तेरा छोरी मारिदिइसकें, म पनि मर्छु’ भनेर मोबाइलमा म्यासेज पठाएको अर्जुनले बताएका छन् । अस्मिताको म्यासेज पठाएको भनिएको मोबाइल नाबालिकाको शवनजिकै फेला परेको थियो । अस्मिताले म्यासेज पठाएको हो कि हैन भनेर प्रहरीले यकिन गरिसकेको छैन ।

सीडीआर (कल डिटेल्स रेकर्ड) परीक्षणका लागि पठाइएको र रिपोर्ट आइसकेपछि प्रष्ट हुने मोरङ प्रहरी प्रमुख एसपी नवराज कार्कीले बताए । घटनाका सम्बन्धमा थप अनुसन्धान भइरहेको जानकारी उनले दिए । नाबालिका छोरीहरुसँगै आमाको मोबाइल फेला परेपनि अस्मिताको अवस्था पत्ता लाग्न सकेको छैन ।

उनी कहाँ गइन् ? भनेर सर्वत्र चासो बढेको छ । यसअघि पनि विवाद हुँदा नानीहरु लिएर निस्किने र पछि घर फर्किने गरेको अर्जुनले प्रहरीलाई बताएका छन् ।

बीपी कोइराला स्वास्थ्य विज्ञान प्रतिष्ठान धरानमा पोस्टमार्टमपछि दुवै नाबालिकाको शवको अन्त्येष्टि गरिसकिएको छ । केरा बगानभित्र दिदीले बहिनीलाई अँगालो हालेको अवस्थामा शव फेला परेको थियो ।

घटनाको प्रकृति हेर्दा विष खुवाएर दुवै बालिकाको हत्या गरेजस्तो देखिने प्रहरीको भनाइ छ । नाबालिकाहरुको शव भेटिएको स्थानमा कीटनाशक औषधि ‘मेटासिट’को बट्टा फेला परेको थियो । शवको प्रकृति हेर्दा नाबालिकाहरुलाई विष खुवाएजस्तो देखिने प्रहरीको भनाइ छ । यद्यपि, पोस्टमार्टम रिपोर्ट आइनसकेका कारण पुष्टि भइसकेको छैन ।

एसपी कार्कीका अनुसार घटना भएयता घटनास्थल आसपास र जंगलमा नियमित रूपमा खोजतलास भइरहेको छ । ‘बेपत्ता भएकी महिलाको खोजीका लागि स्थानीय बासिन्दा र जनप्रतिनिधिले प्रहरीलाई ठूलो साथ दिनु भएको छ । दैनिक सयभन्दा बढी स्थानीयलाई साथमा लिएर प्रहरीले घटनास्थलनजिकको घना जंगलमा खोजी गरिरहेको छ,’ उनले भने, ‘हराइरहेकी महिला कता गइन् र कुन अवस्थामा छन् भनेर कुनै संकेत प्राप्त भएको छैन । मृत फेला परेका नाबालिकाकी आमा अझैसम्म हराइरहेकी छन् ।’

एसपी कार्कीले २ नाबालिका मृत फेला परेको केराघारी र नजिकै रहेको जंगलमा दैनिक खोजी भइरहेको बताए । उनका अनुसार जानसक्ने सम्भावित स्थान र आफन्त भएतिर सोधीखोजी गर्दा पनि केही पत्ता लगाउन सकिएको छैन ।

प्रेम विवाहपछि सधैं विवाद

प्रहरीका अनुसार अस्मिताको माइती संखुवासभाको मुढेशनिश्चरे हो । अर्जुनसँग २०७५ साल फागुन ९ गते प्रेम विवाह भएको थियो । पछिल्लो समय उनीहरुबीच पारिवारिक झगडा भइरहन्थ्यो । शुक्रबार बनाउँदै गरेको घरमा पानी लगाएको विषयमा विवाद भएको थियो ।

वडाध्यक्ष भुवनसिंह मगरका अनुसार सम्पर्कविहीन बनेकी अस्मिताको अवस्था अहिलेसम्म अज्ञात छ । ‘घटनापछि सबै चिन्तित छन् । खोजीका लागि जनप्रतिनिधि र स्थानीयले प्रहरीलाई साथ दिइरहेका छन्,’ उनले भने, ‘प्रहरीले घटनाको अनुसन्धान गरिरहेको छ । घना जंगलमा नियमित खोजी पनि भइरहेको छ ।’ मगरले हराएको ४ दिनसम्म अवस्था पत्ता नलागेको र अनुसन्धानको विकल्प नभएको बताए ।

‘वरपरका कसैले पनि देखेको कुरा गरेका छैनन् । सबै मिलेर काम गर्दा पनि अहिलेसम्म ठोस प्रगति हुन सकेको छैन,’ उनी भन्छन्, ‘अहिलेसम्म ती महिला जीवितै छन् कि मृत्यु भइसक्योभन्ने थाहा भएन । घटनालाई लिएर प्रहरी प्रशासन र स्थानीयले धेरै चासो दिएका छन् ।’

२ नाबालिकाको मृत्यु प्रकरण : अझै फेला परिनन् आमा

मोरङमा केरा बगानभित्र २ नाबालिका मृत फेला, विष खुवाएर हत्या गरेको आशंका

 

तपाइको प्रतिक्रिया
बहिरा फुटबल टोली दक्षिण कोरिया जाने
मत्स्यपोखरीमा चार दिन पर्यटन, संस्कृति र साहित्यको उत्सव
राप्रपामा अध्यक्षका लागि आधा दर्जन नेताको दौडधुप, लिङ्देनलाई चुनौती
लुम्बिनीले टस जितेर बलिङ रोज्दा सुदूरपश्चिम पहिले ब्याटिङ गर्दै
विराटनगरमा कर दिवस मनाइयो, करदातामैत्री प्रणालीमा जोड
प्रहरीको नाममा भ्रामक सूचना फैलाउने दुई जना नियन्त्रणमा पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
नोबेल मेडिकल कलेज छैटौँ पटक उत्कृष्ट करदाता सम्मानबाट सम्मानित
रुसी खगोल विज्ञान ओलम्पियाडमा एभरेस्टकी स्नेहालाई कांस्य
सुनसरीलाई सीसीटीभी निगरानीमा राख्ने योजना, २५० वटा जडान गरिँदै
© 2024 Muluki Khabar. All Rights Reserved. Design & Develop By: Indesign Media Pvt. Ltd.