मोरङमा ट्याक्टर चालकको आक्रमणबाट घाइते भएका ट्रक चालकको मृत्यु

विराटनगर । मोरङको कटहरीमा ट्याक्टर चालकको आक्रमणमा परेर गम्भीर घाइते भएका ट्रक चालकको बिहीबार दिउँसो मृत्यु भएको छ ।

मोरङ प्रहरी प्रमुख एसपी नारायणप्रसाद चिमरियाका अनुसार ना ५ ख ५६१६ नम्बरको ट्रकका चालक सर्लाहीको धुर्कैली घर भएका ५६ वर्षीय गोर्खबहादुर दोङको मृत्यु भएको हो । उनीमाथि कटहरी गाउँपालिका–३ स्थित इको पावर सोलुसन प्रा.लि नामक उद्योग परिसरभित्र बुधबार दिउँसो आक्रमण भएको थियो ।

Advertisement

उक्त उद्योगमा गाडीका पुराना टायरहरु प्रशोधन गरिँदै आएको छ । ट्रकमा पुराना टायर लिएर गएका दोङमाथि टायर झार्र्दै गरेको अवस्थामा को १ त ५०३३ नम्बरको ट्याक्टरका चालक कटहरी–३ का अन्दाजी ३० वर्षीय दिपेश कामतले आक्रमण गरेको एसपी चिमरियाले बताए ।

‘ट्याक्टरमा उद्योग परिसरमा माटो भर्ने काम भइरहेको रहेछ । ट्रक पुराना टायर लिएर त्यहाँ पुगेको थियो । ट्रकले टायर झार्दै गर्दा चालकहरुबीच विवाद भएको पाइयो । ट्रकले बाटोमा अवरोध गरेको भन्दै ट्याक्टर चालक कामतले विवाद गर्न थालेछन् । विवाद बढ्दै गएपछि लाट्ठीले दोङको टाउकोमा प्रहार गरेको खुलेको छ,’ उनले भने । घटनामा गम्भीर घाइते भएका ट्रक चालक दोङलाई उपचारका लागि विराटनगरको न्युरो अस्पतालमा भर्ना गरिएको थियो ।

उनको टाउकाको शल्यक्रिया पनि गरिएको थियो । तर, उपचार सम्भव नभएको अस्पतालले जनाएको छ । बिहीबार दिउँसो ३ः४५ बजेतिर चिकित्सकले मृत घोषित गरेका हुन् । घटनालगत्तै ट्याक्टर चालक कामत फरार भएका थिए । उनलाई खोजी गरेर प्रहरीले पक्राउ गरिसकेको छ ।

कामतविरुद्ध कर्तव्य ज्यान मुद्दा चलाउने प्रहरीको तयारी छ । घटनाको थप अनुसन्धान भइरहेको एसपी चिमरियाले बताए ।