
विराटनगर । सुनसरी कारागारबाट पर्खाल नाघेर भागेका कैदी झापामा पक्राउ परेका छन् ।
खोटाङको दिप्रुङ-चुचुम्मा गाउँपालिका–२ का २८ वर्षीय रूपक पौडेल खत्रीलाई बिर्तामोड नगरपालिका–१० विराट पोखरी नजिकबाट पक्राउ गरिएको जिल्ला प्रहरी कार्यालय झापाले जनाएको छ । उनी २०८२ साउन २८ गते बिहान सुनसरी कारागारको पर्खाल नाघेर भागेका थिए ।
पौडेल जबर्जस्ती करणी मुद्दाका कसुरदार हुन् । जिल्ला प्रहरी कार्यालय झापाबाट खटिएको टोलीले लुकिछिपी बसिरहेको अवस्थामा पौडेललाई शनिबार बिहान करिब ६ बजे नियन्त्रणमा लिएको हो ।
सुनसरी जिल्ला अदालतले जबर्जस्ती करणी मुद्दामा पौडेललाई १३ वर्ष कैद, ५ लाख रुपैयाँ जरिबाना हुने फैसला गरेको थियो । पौडेलबाट पीडितलाई ३० हजार रुपैयाँ क्षतिपूर्ति भराउने फैसलासमेत गरेको थियो ।
पक्राउ परेका पौडेललाई आवश्यक कानुनी प्रक्रिया पूरा गरी थप अनुसन्धानका लागि जिल्ला प्रहरी कार्यालय सुनसरी पठाउने तयारी भइरहेको प्रहरीले जनाएको छ ।

























