मोरङमा प्रहरी कार्यालय आगजनी गर्ने २१ जना पक्राउ

Share this
791shares
मुलुकी खबर
मुलुकी खबर
clock२०८२ कात्तिक २८, शुक्रबार १६:१५

विराटनगर । जेनजी आन्दोलनको आवरणमा मोरङका प्रहरी कार्यालयमा आगजनी र तोडफोड गर्ने अराजक समूहका २१ जना पक्राउ परेका छन् ।

प्रहरीले विराटनगर र मोरङको जहदाबाट १० जना, पथरीशनिश्चरेबाट ६ र उर्लाबारीबाट ५ जनालाई पक्राउ गरेको हो । जेनजी आन्दोलनका क्रममा गत भदौ २४ गते मोरङको इलाका प्रहरी कार्यालय उर्लाबारी र पथरीमा आगजनी एवं तोडफोड गरिएको थियो । आगजनी र तोडफोड गरेर थुनुवा भगाउनुका साथै प्रहरी कार्यालयका कागजपत्र पनि जलाइएको थियो ।

त्यस्तै, विराटनगरमा जिल्ला ट्राफिक प्रहरी कार्यालय मोरङको कार्यालय तथा विभिन्न प्रहरी बिटहरुमा आगजनी र तोडफोड गरियो । सीआरभीको गाडीसमेत जलाइयो । ट्राफिक लाइट र सीसी क्यामेरा पनि तोडफोड गरिएको थियो ।

भदौ २४ गतेको अपराधिक घटनामा संलग्नहरु अहिले धमाधम पक्राउ पर्न थालेका हुन् । उर्लाबारीबाट उर्लाबारी नगरपालिका–६ का उदय साह, बब्लु सहनी, मिलन राई, राजकुमार सहनी र उर्लाबारी–७ का रविन सुन्दास पक्राउ परेका छन् । पथरीबाट पथरीशनिश्चरे नगरपालिका–१ का चन्द्र कार्की, दीपक चौधरी, मुकेश बराइली, विश्वास थापा, सिद्धार्थ राई र मिथुन मण्डल पक्राउ परेका छन् ।

विराटनगर र जहदाबाट १० जना पक्राउ परेका छन् । पक्राउ पर्नेमा विराटनगर महानगरपालिका–५ का विशाल माल्मिकी, गोपी साह तथा विराटनगर–६ का विष्णु साफी, चन्दन बर्मा, किसन सहनी र विराटनगर–१४ का राकेश यादव रहेका छन् । त्यस्तै, जहदा गाउँपालिका–२ का प्रवेश मण्डल, जहदा–३ का सुशील यादव, जहदा–५ का सुरज सिंह र मुकेश कामतलाई पनि प्रहरीले पक्राउ गरेको छ ।

पक्राउ परेकाहरुमाथि आपराधिक उपद्रव मुद्दा चलाउन शुक्रबार जिल्ला अदालत मोरङबाट म्याद थप गरेर अनुसन्धानको बाँकी प्रक्रिया अघि बढाइएको मोरङ प्रहरी प्रमुख एसपी कवित कटवालले बताए । ‘जेनजी आन्दोलनका नाममा प्रहरी कार्यालयमा आगजनी र तोडफोड गरेर आतंक मच्चाइएको थियो । अराजकता मच्चाउनेलाई पक्राउ गरेर कारबाहीको दायरामा ल्याउन थालिएको छ । घटनामा जोसुकै संलग्न भए पनि उन्मुक्ति पाउँदैनन्,’ उनले भने ।

मोरङ प्रहरीको यो कारबाहीबाट आतंक मच्चाउने र हुलहुज्जत गर्ने तथा आगजनी र तोडफोड गर्नेलाई प्रहरीले छाड्दैन भन्ने सन्देश प्रवाह भएको छ । एसपी कटवालले भदौ २४ गतेको घटनामा संलग्नको विवरण अझै पनि संकलन गर्ने काम भइरहेको बताए । ‘सीसी क्यामेरा फुटेज, भिडियो र फोटोलगायतका प्रमाणको आधारमा विध्वंस मच्चाउनेहरुको पहिचान गर्ने काम भइरहेको छ । पहिचान भइसकेकालाई पक्राउ गरेर कानुनको दायरामा ल्याइसकियो,’ उनले भने ।

आगजनी एवं तोडफोड गरेर विध्वंस मच्चाउने अराजक समूहका अन्य व्यक्तिहरुको पहिचान, खोजी र पक्राउका लागि प्रहरीको विशेष टोली परिचालन गरिएको छ । विध्वंस मच्चाउने समूह प्रहरीको निगरानीमा रहेको एसपी कटवालले बताए ।

आन्दोलनको आवरणमा विराटनगरसहित मोरङका विभिन्न स्थानमा आगजनी र तोडफोड गरेर सरकारी एवं निजी सम्पत्ति र व्यापारिक मल ध्वस्त पारिएको थियो । विध्वंस मच्चाउने जोकोहीलाई कारबाहीको दायरामा ल्याउने प्रतिबद्धता प्रहरीले जनाएको छ । प्रहरीका अनुसार घटना गर्न उक्साउनेलाई पनि कारबाही गरिने छ ।

‘कसैलाई पनि उन्मुक्ति दिइने छैन । पहिचान गरेर सबैलाई कानुनको दायरामा ल्याइने छ । घटनासँग सम्बन्धित फोटो, भिडियोलगायतका प्रमाणहरु संकलन गरेर विश्लेषण गर्ने काम भइरहेको छ,’ एसपी कटवालले भने । सुरुमा प्रहरी कार्यालयमा आक्रमण गर्नेहरुलाई कारबाहीको दायरामा ल्याइएको छ ।

त्यसपछि सरकारी एवं निजी सम्पत्ति ध्वस्त पार्नेलाई कारबाही गर्ने प्रहरीको तयारी छ । भदौ २४ को अराजक घटनाले प्रहरीको मनोबल खस्किएको छ । जेनजीको नाम लिएर अपराधिक कार्यमा संलग्नलाई कानुन बमोजिम कारबाही गरेर प्रहरीको मनोबल उच्च बनाउनेतर्फ केन्द्रित हुने एसपी कटवाल बताउँछन् ।

उनका अनुसार अपराधिक गतिविधि गर्ने र अराजक भिडलाई उक्साउनेहरु भाग्न नपाउन् भनेर प्रहरीले निगरानी बढाएको छ । तिनीहरुलाई कानुनी दायरामा ल्याउनका लागि प्रहरीले संवेदनशील भएर काम गरिरहेको जानकारी एसपी कटवालले दिए ।

‘प्रहरी नागरिकको सेवामा प्रतिबद्ध छ । आन्दोलनपछि खस्किएको प्रहरीको मनोबल उच्च बनाउनेतर्फ केन्द्रित छौं । शान्ति सुरक्षाको अवस्था मजबुत बनाउँदै अपराधिक गतिविधिमा संलग्नलाई पक्राउ गर्न विशेष टोली परिचालन गरिएको छ । जुनसुकै खालका अपराधलाई नियन्त्रणमा लिन र अपराधमा संलग्नलाई कारबाही गर्न प्रहरी निर्मम हिसाबले लाग्छ,’ उनले भने ।

सबैसँगको सहकार्यलाई प्राथमिकतामा राख्दै शान्ति सुरक्षा चुस्त दुरुस्त बनाउन निर्भीक हिसाबबाट प्रहरीले काम गर्ने उनी बताउँछन् । उनले नागरिकले अनुभूति गर्ने गरी सुरक्षा दिन प्रहरी तयार रहेको बताए । सबैतिर प्रहरी सक्रियता बढाइएको र प्रहरीले कारबाहीलाई तीव्र पारेको जानकारी कटवालले दिए । आन्दोलनका नाममा विध्वंस मच्चाइएको घटनासँग सम्बन्धित प्रमाण भएमा उपलब्ध गराउन प्रहरीले सबैमा अनुरोध गरेको छ ।

यो पनि पढौं

माओवादी र एकीकृत समाजवादीका कार्यकर्ताको अगुवाइमा जल्यो विराटनगर

तपाइको प्रतिक्रिया
शीर्ष नेताको सम्बोधन, रित्तो दर्शक दीर्घा: मोरङमा कांग्रेस इतर पक्षको अधिवेशन
बहिरा फुटबल टोली दक्षिण कोरिया जाने
मत्स्यपोखरीमा चार दिन पर्यटन, संस्कृति र साहित्यको उत्सव
राप्रपामा अध्यक्षका लागि आधा दर्जन नेताको दौडधुप, लिङ्देनलाई चुनौती
लुम्बिनीले टस जितेर बलिङ रोज्दा सुदूरपश्चिम पहिले ब्याटिङ गर्दै
विराटनगरमा कर दिवस मनाइयो, करदातामैत्री प्रणालीमा जोड
प्रहरीको नाममा भ्रामक सूचना फैलाउने दुई जना नियन्त्रणमा पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
सिन्धुलीमा ढुंगाको लोहोरो प्रहार गरी श्रीमतीको हत्या, श्रीमान् पक्राउ
नोबेल मेडिकल कलेज छैटौँ पटक उत्कृष्ट करदाता सम्मानबाट सम्मानित
रुसी खगोल विज्ञान ओलम्पियाडमा एभरेस्टकी स्नेहालाई कांस्य
© 2024 Muluki Khabar. All Rights Reserved. Design & Develop By: Indesign Media Pvt. Ltd.